2024回顧

到咗年尾，總會想寫一下今年發生咗咩事。。。今年我知我犯太歲，所以事事都小心啲，寧可信其有，都係聽下啲師傅講好啲。

昨日係度諗，舊年倒數我做緊乜。。。諗咗好耐，我終於記得了，我終於記得我嗰晚我最終去咗邊度倒數了。嗰日好似俾人遺棄咗，跟住上咗個朋友屋企傾計。。。。傾完倒數坐多陣就返去瞓，因為大家第二日都要去行山。最終我都係整親既...

今年大部份都係小病，小病是福，無咩太特別，只係一次covid，一次氣管炎(懷疑係輕肺炎)，一次咳到爆，一次大拉傷，一次扭親，完了。

今年仲轉咗三份工，一年三份，真心多，我又何嘗唔想一份工打到老，但命運不是這樣，我唯有樂觀地面對，總有改變的時候的，每一個人，每一個地方，我都會學到一啲野返嚟，多少真係要睇自己了，但起碼係一定有啲野落袋。煮到埋嚟就食啦。第三份工都只希望順順利利。。。

今年去咗一轉旅行，我係有少少任性地去旅行的，又係一個人去，但我相信我一定解決得到的。友人成日話我，我有既係勇氣和材智，呢啲係好多人無既。所以唔駛驚，我一定解決得嚟既。最終個旅行平平安安順順利利。

今年都識咗唔少朋友，年尾跟啲朋友既朋友識咗唔少人。。。朋友都為我繄張，我知既，我盡力啦，我知我唔可以禁宅，要行出去，拎啲勇氣，發揮自己最強既吸引力。

年中被人毒入坑追泰妹，一路係坑底。。。識咗啲坑底既朋友，但我都係鐘意自閉一下，冷靜一下。

講愛情？都係零。有少少野諗通咗，唔想再係個圈度轉，又係時候要抽身，我知自己做緊乜野既。面對事情，我可以好理性，但面對愛情，呢樣野係我最唔理性既一面。但為咗自己著想，既然唔珍惜，不如搵個真心珍惜我既人啦。人哋點對我，我係完全知既，我唔係一個蠢人，我仲要觀察力禁強，點可能唔知吖。。。雖然我對愛情失望，但我希望不要絕望。

我知人馬座最深既一面好難俾人知道，所有人都只係知人馬最開心的一面，但人馬最內深的深處只會表露俾佢覺得安全的人。我係一個好人馬既人馬，所以。。。我開心的一面，所有人都會見到，見到我唔開心的一面的人，會係我既好朋友，我感謝我所有的好朋友今年的相伴，下年多多指教，感謝各位。

我唔太想寫2025展望了，我只希望一切順順利利平平安安，各人身體健康。我唔太敢諗得太遠，因為生活存在住太多變數，我根本捉不穩，說不定。good luck 2025.

十二月了

 唔經唔覺就到咗十二月了。有點忙，為工作，為屋企，為打波，仲有為好多好多既野。。。真係好忙，仲走咗去追星，都係海巡啫，個人係無時間去追既，順路去打一陣咭就會去。

工作有啲忙，需要時間適應，無論係logic，同同事關系，仲有工作內容，都係要時間去習慣和適應一下，但我無拎電腦返屋企，直接車係公司，起碼我返到屋企唔駛對住部腦做野先啦。不過之後可能會再忙啲。呢份工幾喜歡，希望順利，做耐一啲啦。係度做，最唔好的壞習慣係每日兩杯咖啡。。。有啲過份呀。。。

屋企係我個人太累，少咗執屋啦，少咗睇老豆啦，無時間處理阿嫲既野和阿媽既野，忙到痴咗線，希望下個月好啲，近期真係無咩時間，太多生日飯要食了。

打波，其實呢期真係打少咗，因為真係無時間呀。。。太忙根本無時間打，加上又好難book場。。。上星期有日得閒，我哋又無場，最終我係出面搵咗場波打!嗰場波開初中場，大部份人都有初中，公主仲話想跟我打，都真心難，我有初中的，嗰晚我都好少認真打。。雖然無拎最勁嗰支出嚟，但都夠打啦。我好耐無認真打波了，嗰晚仲有人讚我手波好呀~XDD 有啲波有笑我，我認真打，可以打死好多人~XDD

最近去啲group識下朋友，有啲朋友推我去識下女仔。有個女仔有啲好感，但係咪好喜歡，我又真係唔知。我好似對女仔無咩感覺，係我的問題，又還是對方的問題？我真係唔知，我只知我要甩掉過去嗰啲囉。。。我想向前行，就知我一定唔可以再停係度，係個圈度轉。個唔健康既關係拖太耐了，唔好再玩自己好嗎。

2024年生日快樂

 2024年的生日，近期不停食生日飯，不停食，有時見下啲好耐無見的朋友，都真係幾好的。

今晚我約咗女神食飯，好耐未見過佢了，知道佢屋企發生咗啲近況，無咩可以做，唯有就係陪伴，聽下佢訴下，聽下佢講野，安慰下佢，為佢打氣。大家都係人馬座，仲要差一日，所以佢點諗，我會明白的。我明白佢樂天背後的悲觀，所以我唔會介意俾佢見最軟弱的一面，更唔介意聽佢講佢的野，只係佢的野，我唔太會周圍講。

 今晚佢為咗趕嚟見我，跌到。。。好彩唔嚴重，如果唔係我真係過意唔去。今晚我主動幫佢處理傷口，我見佢傷口唔係禁大，都安心一點，我簡單處理完，貼返膠布就完了。我仲見佢傷口埋得好快，好快就結焦，所以我安心一點。佢話佢遲到，唔好意思我等禁耐，所以趕住嚟，佢仲話佢成日跌親，成日都整親膝頭，嗰個位幾年又整親一次喎。我又何嘗唔係呢，只係我有時身手好啲，touch wood要識跌囉。

今日中午，我突然記得女神鐘意食炒栗子，我研究咗一下荔枝角嗰頭有咩炒栗子，最終決定係紅磡買。我有諗過返葵芳去佢鐘意食嗰檔買架，但又諗多下，玩到禁大，點收科，一陣佢知，我就死得架啦，唔好禁啦。

今晚同女神食飯有段小插曲，我以為我對女仔無咩感覺架啦，點解無感覺，另一篇先講啦。今晚女神未嚟，我同一個女仔一齊坐電梯去餐廳，佢坐咗係我則面嗰枱，其實佢幾靚，我有望有留意佢幾次，有少少feel既。。。點知女神一到，周圍既所有野完全唔知發生咩事了。

我見到有個餐牌有連豬，女神無留意到，我同佢講笑，佢掛住望我，無留意周圍既野，哈哈~~佢話一定係啦。有時同佢交流都幾開心，我同佢講笑，佢會入返我一野，我無力反擊，完全俾佢攻，哈哈哈哈。我都係借啲依想引佢笑，氹佢開心啫，如果無心無意，我唔會去做禁多野，為咗佢，我會去做，第個又或者未必啦。

今年我的生日願望除咗身體健康和事事順利外，我還想女神身體健康，屋企的事總會發生，要保重身體啊。

今年我收到唔少生日禮物，所有朋友都好有心，隻貓最可愛，我當然最愛女神送俾我的生日禮物啦，佢仲話佢喜歡呢啲野，唔知我鐘唔鐘意。我鐘意架，只係我屋企無位放啫。。。我搵定個display box放佢送俾我份禮物先。

生日有咩節目？都係去拜媽咪和海洋公園，仲有同阿妹食飯，夜咗再返嚟同熊仔s慶祝。。。

昨晚同朋友食飯，朋友安排咗間餐廳的蛋糕俾我，有隻care bear架...我見到超開心，朋友仲話本來想畫grumpy，但間餐廳話grumpy好似唔係好開心喎，不如畫隻開心啲既，最終畫咗bad time....哈哈哈哈

其實grumpy係我既生日禮物嚟架，我生日，佢都生日，佢係會嬲，會發脾氣，但隻熊心地唔差架，仲好有義氣，又warm，係脾氣差啲啫。。。XDDD最終我返嚟同rain講，佢又發脾氣，嬲咗。。。一陣~~

福岡旅行

成年幾無去旅行了，對上一次係AXA返工前，去咗轉快的台北。。。其實我想去泰國的，因為。。。泰沉迷了，坑底的朋友～～但泰國一個人去，有啲危險，所以最終都係去日本了。

好多年前同媽咪去過東京，想去另一個地方，睇完機票就決定去福岡了。一個人，點都要plan下行程，無揸車，全部都係坐車，所以要搵定點坐車，點去。成個行程真係趕頭趕命旅行，好痴線，行得晒，食得晒，真心好痴線，唯一無時間行門司港。。。真係趕唔切，所以唔去了。

最開心係最後一日的行程，去咗睇水族館和行公園。去到個公園，睇完地圖，見到有單車租，就租架車啦，上咗單車就。。。完全唔駛諗，高速出發，玩咗10km...兩個鐘連行連食，玩完。玩單車太開心了，完全唔記得咗好多野，但架車真心麻麻，架車唔去，可能係車種的問題，不過算啦，有得玩好過無得玩。玩完無肌肉痛，咩事都無！都係有運動的好處啊。

好耐無試過自己一個人去啲唔識的地方了，所以要做到好足功課，計好晒時間，搵定點去等等。雖然有啲驚，但呢個未知的感覺，好耐未試過了。

一個人係有啲寂寞，但起碼我唔駛再就人哋先，可以好自由禁決定去邊和點行，可以隨便更改行程，但其實我都唔係改得好勁，只係有時快咗行完就早啲去下一個景點和加咗少少行程，轉咗啲時間之類啦。。。

其實福岡真係好多香港人去，行開行埋都係廣東話，有時我聽到廣東話，都會答人哋一兩句，好笑。最好笑係坐車，有個婆婆不停同我講日文，我一句都聽唔明，想用google translate又慢。。。最終我用google translate答咗佢一兩句，總之好笑啦～最後都落咗車，講咗句bye bye~~

由於最近不停都係泰文，所以。。。聽到人哋講泰文，我好快就知道了。做香港人幾好，識多國語言。。。只係無一樣精之ma...哈哈~~

自己去完福岡後，又開始諗下下次自己去邊了，可能。。。去泰國追星。。。成個腦都係星，真係係坑底了。

just update~~

呢幾日無返工，除咗休息整理一下屋企的野外，還有是執一執自己電腦的folder，dropbox的folder，太耐無整理過了，由其是。。。自己shop的野。

呢幾日咳到爆肺禁，係之前氣管敏感的後遺證，還是新的病呢？真的不知道，只知要戒口，要休息，要搵返自己的時間。真的有點累。

身邊的朋友總會為我擔心工作的問題，而我好似完全無擔心過一樣，又或者是我太樂天吧。真的太過樂天了，這就是人馬啊。。。

我心入面其實好多計劃，我諗熟我的人，應該知我唔會打無把握的仗。呢個係我格言，無論呢個仗係win or loss，但永遠都唔會無準備去打。

呢期我完全迷咗係泰百入面，由舊年睇freen becky到睇pfaye and Yoko...跟住直接轉會去LingOrm and LMSY。。。真係死得快，沉得更快。。。哈哈，每日都要搵LingOrm叉電。。。見到CEO禁勤力操野，我都唔可以禁鬼懶，我知我好懶，但真係要勤力啲架啦，唔想郁都要郁下，為自己好定咩都好啦。

之後有時間會打返啲之前睇過既野既short description，for keep record or for other 都好啦。總之用notebook打字，真心好舒服呀。

又再一間公司了。。。

 又再一間公司了，今次係聲稱和平分手喎。。。真係和平，我病到根本無力氣回應佢所有野。

話說八月中我搵到3HK呢份工，見完工唔夠兩日已經叫我返工了，唔好話身未ready，心都未ready...禁唯有返住先啦，上手嗰個仲有兩星期走，我要接佢啲野，唯有努力睇住問啦。。。但發覺好多野好亂啦，量好多啦，好舊啦，好多手啦，最唔適應真係工作習慣。。。我好多年無physical係度開會，無notebook，得張紙，print excel和ppt出嚟開會....咩料呀。。。問你野時，我根本答唔到，因為習慣寫係電腦度和係返電腦搵野，睇住人做一次，我真係會死的。。。記唔到架。。。。呢度就係禁舊。。。到開會問既野，根本你一個powerbi就可以做到。。。唉。。。痴線，最瘋狂係廿年前data mining要做的野，要用人手做。。。真心痴線。。。好累。。。

近呢兩星期我真係做得好唔開心，我知我有少少壓力，加上情緒唔好，都知我知哋，所以又開始去睇下工，無send出去，望，直到上星期無啦啦有agent搵我，我同佢傾咗一陣，無論得唔得都好，起碼有人搵。。。有啲希望，放假俾自己考慮清楚係咪真係想走，最終星期日晚瞓前決定，叫agent process啦，唔一定得，試下先，有interview再諗點in啦，我真係唔係好鐘意呢度既工作模式。

決定轉工的念頭係由佢叫我整個weekly summary 起的，我用python寫咗少少code想搵data做野，寫code令我快樂，無得寫code要我抄數落report到整啲excel，仲有寫有咩finding... 我真係唔係好鐘意做。。。。認真。。。我真係鐘意寫code多啲。諗返近幾年邊份工做得最開心？都係當年hsbc日日寫code開心啲，真係日日寫，有啲好快寫完，有啲要時間諗，只要係寫code，我寫完就快樂。。禁不如真係搵份可以寫code既啦，唔好再係呢啲report度磨啦。

其次真係佢拎啲data warehouse既data出嚟諗點用，點賣開始。佢做緊既野，係廿年前玩data mondeling既野，今日用ai做啦，由data science去train個ai...真係痴線，9做咗啲野出嚟俾佢哋自己諗了。我由第一下見到，心入面就只有個伏字。。。連powerbi都唔用，要去做analysis...你自己玩埋佢啦。。。

其實有師傅講咗我今年會有好多轉變，有講過我未轉完工既，我都奇怪，未轉完工？年底又轉？我直覺似，好似當年一樣，兩年五份工，最短得三星期，好彩未破紀錄，不過嗰份補返一個月俾我，都好。現在有七日都唔緊要啦，我仲擔心緊我要交好多錢稅。。。因為上年我放咗個半月假。。。今年放得半個月，交稅交到好甘。。。

我今年犯太歲，除咗工作會變，好多野都會變，我無得控制太多，唯有就係接受，和面對。。。正面地面對。要相信自己可以，要有多啲自信。唔怪得之之前占卜都有講，就算我搵工，都唔會好啦，頂。。。又會禁準既。。。

無野做，除咗係屋企休息一下和執屋外，我終於可以抽啲時間去拜媽咪了。重陽我想搵時間去拜媽咪，紅日好多人，所以想閒日，但閒日我又要返工又無wfh...有wfh我就中間lunch出去啦。。。

又完一份工，呢份學到既係我真係搵返份有2/3時間寫code既，唔好做禁多excel report既，唔好搵啲禁old school 既工，仲有admin 或者太paper work既野，我真係唔啱做。。。加油呀。。。

夢到媽咪

 好耐都未試過夢到媽咪了，昨晚突然夢到媽咪，唔知媽咪係咪覺得我太悶，想陪下我呢？又還是她知道我呢期太累，想我瞓多陣，陪佢多一陣呢？

昨晚的夢係媽咪煮咗飯，記得背景唔係我哋屋企的，人物有大眼妹表姐和表姐夫，還記得媽咪叫我拎碟雞翼出去食俾表姐夫食，仲話專登整俾佢食，我望住媽咪，媽咪知唔我想點，佢話有留俾我食。。。哈哈。。。我好聽話禁幫佢招呼其他人了，而佢就係廚房煮野食，大家都食得好開心，好似以前一樣，媽咪煮好多野，我會主動去幫佢手，又習慣性地偷食。。。

一切一切都好似以前禁，我記得我好乖好聽話，好似平時禁。阿媽都應該係唯一一個可以治到我，要我乖乖地聽話唔搞搞震的人。

其實我真係幾跳皮，好鐘意搞搞震。。。應該無咩人治到我的，除咗我媽。。。。哈哈~~~

媽咪死忌，第四年

 唔經唔覺又到媽咪既死忌了，已經第四年了，媽咪，您好嗎？我有乖呀，我有照顧屋企，盡力啦，有時真係好想懶，有時真係好累。

雖然已經四年了，但嗰份感覺，嗰份無奈，嗰份唔捨得仲記得。時也命也，有些事情總是改變不了。我唯一遺憾既係，本身諗住等媽咪七十歲帶佢去新加坡玩，可惜未能成行，而我近呢幾年都無計劃要去，或者我都係時候諗諗係咪要去一轉呢？

我好似好耐無去旅行了 ，可能因為每次旅行都係自己一個，所以無咩動力想去。我怕悶既，從來都係，但又唔想搞住人，阿妹又要照顧阿仔，所以好少搵阿妹去。而且我成日轉工，想去都難啲。我喜歡有啲目的的旅行，或者真係可以諗下整啲旅行vblog，再諗啦，暫時只係諗十二月去唔去旅行呢？去日本既話，又想買咩拍呢？我好似好多新玩具喎。

講起媽咪，總記得媽咪留俾我哋的習慣係自己煮，好少出去食，好少買外賣，我搬出嚟禁耐，都盡力做啦，鬼叫自己食野好多限制咩。。。。又唔鐘意食汁，又唔鐘意食飯，最怕汁加飯，太油又唔得，好多野唔食，禁叉煩，不如自己煮啦。。。。所以我都多自己煮，好少買。

又講起媽咪，還記得媽咪講過，當年一定要求我同阿妹要讀上午班，由幼稚園已有這個要求了，原因因為我太懶了。。。如果我返下午，一定瞓到好晏先起身返學，返小學就真心大獲了，所以點都要我返上午班，早啲起身返學。。。最終都係朝朝打完先起身返學，哈哈~~

其實我性格真係好活潑，真係激死阿媽嗰隻，聰明醒目，但懶，最叻唔係讀書，係諗方法懶住逹到目的。。。哈哈，但我把口又幾好，識得氹阿媽和阿嬤，氹到佢兩個都無還擊之力。睇住焯楠，有少少我的影子，但係我唔硬頸，再古或啲，再醒啲，再聰明啲～～

阿嬤有時為咗管教我的方法同媽咪嘈，唔知邊個好啲，但我起碼無學壞先啦，又無打交，又無蝦蝦霸霸，自己又搞得掂自己，還可以吧。但媽咪俾我有適量的自由，或者我個人真係太過人馬吧，非常喜愛自由。

講起媽咪總會好多好多野講，掛住媽咪既心好似無變過一樣。媽咪，下個月我又過嚟探您啦。

今日拜媽咪，老豆撞到個人又係拜親人，我老豆把口真係。。。唉，我唔理佢，無出聲，靜靜地望住媽咪，掛住媽咪。

又一間公司

 近期都係忙和懶，所以都係好耐無寫 blog。。。點都想記一下近期發生咩事。。。。

又一間公司的完總了，今次頂到一年。份工唔係唔好，但工作既野實在太過瘋狂了，我都唔知可以點講，有WFH，但根本係假象，做到隻野禁，痴根。學咗好多野，但因為啲report成日錯，所以不停俾人鬧，不停鬧只會不停錯，真係壓力好大，好累，完全唔返公司面對啲同事。啲同事相處又唔好，唉，只係感覺非常辛苦。做禁多年野，最辛苦都算係呢份了。

以前做HA都辛苦，日日返去玩辦公室政治，所以頂咗三個月就走了。呢度原來都有既，會有好多人無啦啦係你背後插你幾刀，你做得好，唔會有人讚你架，好似應份禁，做得唔好就講晒粗口狂鬧，唔係俾你fix咗先，係狂鬧先，唉。。。

一年完總，本身諗住搵工走，但可惜係。。。形勢根本唔容許我可以搵住工走，唯有先辭職，再搵工。可能好心有好報掛，最終佢都唔駛我再返去，提早放過我。呢個決定對佢對我都係一件好事。我可以休息下，又再以沈澱一下所有有事情，思考一下未來等等。

放假有咩好做？打波，休息，整理屋企的野，仲有。。休息囉。剛剛唔駛做野既啲時間就係奧運的時間，所以睇奧運睇到傻L咗....

無人機表演記

 早幾日落雨地滑，跣咗一野，好彩向後跌，pat pat落地，右手拎住遮，好似無咩野，但呢兩日終於發出來了，右手手腕舊患又痛返，好彩唔嚴重，但有時都係發唔到力。。。呢個舊患真係好耐無發作了，仲記得個傷點嚟，係開門扭親既，記得睇跌打，敏感，最尾都無睇多次，唔痛就算。當年暴龍知我手痛，去買咗個護腕俾我，要我戴住，我記得佢好溫柔好擔心禁幫我搽野既樣，可能當年因為我係佢愛人掛。我記憶中俾到我禁既感覺既人唔多，除咗親人外，應該只有佢。。。但今日要我返轉頭，我唔會啦，但我真係感謝佢當年禁愛我既。

講返隻手，我未搵到個護腕，應該lock兩日無事架啦，仲有呢排唔好打禁重拍啦。。。忍下手，唔好殺禁多，無事既。

昨晚出咗去睇無人機，聽到個消息，我知自己得閒既，所以一早計劃去睇，而且無打算禁早啲出。好彩唔禁早出，等到發毛！其實有得睇真係好想興奮，睇嗰刻仲興奮，係正頭頂呀！超勁，好大隻叮噹係頭頂呀，好開心，好正呀！可惜走亂到一個點，商場又封路，人又多，又散唔到人，好彩無事，有事都幾大鑊呀。

我影到我部電話無晒位，哈哈，十五分鐘，全程拍片，好正。

我仲未諗掂去日本旅行去邊好，又去東京既話。。。又去搵叮噹？去過了，想去搵幪超多啲，諗唔掂，唔諗住。。。

早幾日佢搵我，因為佢個ex要拎返部電腦，佢驚有啲對佢不利既野係部腦度，我開到既，抄到手既都copy晒落我部機度了，佢有個ac lock咗，無password，之前同佢撞過，都開唔到，佢問我有無辦法開到，我真係無計了。。。累。。。我嗰晚返到屋企再望多次嗰啲file，應該無咩特別野。但我見佢檢樓既文件都係度，買樓既野係度都唔出奇。不過借人禁多錢買樓，就應該還返俾人啦。我唔係嗰種人，我唔會有明嗰種人點諗既，所以我唔應該插手理任何野啦，又唔關我事，又唔係我邊個，我唔需要禁上心去理架，要理，搞咗阿嫲啲遺產先啦。。。唉。。。煩。。。

份工都夠我煩了，屋企啲野都係煩，打波幫手管理都係煩，校友會既事，聽到覺得煩，只係我盡力甩身，叫做煩少樣。都禁多野煩，唔係我應該要理既野，由佢啦.....

無聊記事

今日都幾多新聞。。。又紅雨，又台中捷運隨機殺人，最恐怖係新加坡航空架飛機係英國飛返新加坡，遇氣流急降曼谷，有兩個人死。。。。

記得細個有次放學食午飯睇新聞，有冇一段係講香港既飛機失事，衝咗出跑道，記憶中好恐怖。所以現在每次坐飛機都會有啲驚，最記得係第一次見同暴去旅行，起飛時我捉到佢好實，我諗佢都知我有啲習慣瞓著咗，緊張都係會捉得好緊，由其瞓時最明顯，所以佢發現我捉到佢好緊，就會拍醒我。有時我自己都知。。。見我平時要攬雨仔瞓就知我無咩事安全感啦。

其實我有冇啲習慣，知佢坐咩機，都會望住起飛，望下幾時到，到land又會望住平安land先安心，但其實佢又唔係我邊個，我根本唔需要太過緊張和擔心佢既。放手啦。。。

呢兩晚無咩野搞，又無去打波，放工就返屋企了，係屋企其實好舒服，早啲返屋企仲可以陪下我隻熊仔～費事佢又發我脾氣。。。

車仔自從睇完粉紅理論後，迷上咗feenb, 佢兩個又真係好靚既，睇佢哋又真係開心既，迷明星好似生活有啲方向既，之前都有追ash，呢期你乜叉都唔追，因為無咩心情都，只係咩都唔想。我仲積咗好多les片未睇，唔想追劇，所以遲啲先啦。

我六月前要清五日假，頭都痛晒，有一日係要開校董會，仲有四日我都唔知點放好了。。。有諗過又一個人飛，但都唔知飛邊度好，台灣，韓國唔想去，大陸就更加唔去啦，所以都應該得日本先選擇，但日本去邊？東京？我好似無咩地方想去，除咗羽毛球店外。。。地方無咩特別想去，可能我個人太需要planning，所以總係要有啲目的先想去。或者我真係要諗諗去旅行，帶貨又好，做yourtuber又好。。。咩都好，總要搵啲野搞先去啦。

呢期唔知搞乜，成日都有啲唔識既電話FaceTime打俾我，仲要打我另一個電話號碼，我無咩點公開過我嗰個電話號碼，真係唔知點解，但我最終都係無聽，由佢響，我都估係啲呃人電話。。。

嗰日同嗰班谷友出完嚟，佢哋又想再約，我無咩所謂，時間啱咪去囉，但我心中知普通朋友online，明既，唔係target，記得要留手，唔好做禁多野，唔好做禁多，要記住唔好俾錯msg人哋！

喜歡你是你 and 圍城

最近呢兩晚都好早返到屋企，一來累，二來想休息整理一下自己的野。所以無聊下用1.5倍睇咗兩套港產片。。。

先講圍城，講九龍城寨，一個三不管地，一個充滿傳奇的地方，一個滿有故事的地方。我睇的 version係。。。老番version，但都清楚既，好睇既，打到仆街，打到傻，有啲位幾誇張，個故事幾有漿力，各演員都做得幾好。唔講太多故事既野，因為真係無咩需要帶腦入場睇，打既位我接受到。。。好彩1.5倍睇，打快啲，快啲打完。。。有時係屋企睇既好處就係悶你可以飛，慢就加速，由其對我呢啲無耐性，無時間，又趕既人。。。真係一個好方法。

講完圍城，講另一套想睇好耐，但一直無咩心情想睇。。。喜歡你是你，又係一套以同性戀為主題既電影，同從今以後一樣寫實，都係會經歷的事，只係《喜》真係會經歷過，《從》未經歷到。

《喜》講兩個女仔讀書時的經歷。。。到最後唔算係happy ending。。。係學校既經歷，我試過，但我唔係女校，仲係教會都試過，屋企。。。試過，但無電影中既家庭既可接受，其實我妹接受咗，我媽知，但都係我開心就ok，只係我老豆接受唔到。學校和教會對同性戀都仲係禁忌，佢哋嗰份唔接受，真係好令人難受。我知，呢個都係我內心最深處既記憶，有無影響過我？唔知，或者有掛。

再講愛情，愛一個人係無得控制既，有時暗戀都係一件美好的事。當然我的暗戀都仲係暗戀，唔想俾佢知，到今日或者佢估到，或者佢身邊朋友知，但我都盡量唔俾佢知，唔俾其他人估到，當然我身邊既親密朋友會知啦。佢會係我最後一個暗戀的人。。。雖然都成三十年。。。真心痴線。。。都唔知係傻定蠢。。。

再講愛過既人搵到幸福。。。我知既，既然唔係我，真係應該放手，祝福佢搵到個真係鐘意既人，祝福佢幸福快樂啦。我都佩服自己講得出口，講嗰刻真係好似拎把刀插入自己個心一樣。但呢樣野，無論自己感覺係點，都唔可以表露出來，唔想佢難受，要自己大方啲，成熟啲。成套戲，最後呢幕我喊得最勁係呢個位，反而《從》。。。佢死嗰幕喊過後就無了。

今日陪咗阿妹帶埋阿仔去參觀學校，成個人散晒，仲辛苦過返工。。。我見到啲miss靚啲都仲識得俾下反應，我應該就無事掛。。。雖然我唔識再愛了，真心累，所以完全無動力識人，只想自閉。

我班朋友都算係禁，唔知我咩事，聽到我想煮，就借個廚房出嚟俾我煮。。。其實我唔開心就會想煮，煮完又食唔晒，有人幫手食就最好了。聽晚又想煮。。。又有人肯食，真好。但我都唔太想講咩事。。。除咗潔瑩。。。嗰晚同潔瑩傾計食飯，佢又講返當年我帶暴龍出嚟食飯，佢哋俾暴龍唔出聲個樣嚇親。。。仲話我身邊嘅人個個都禁大脾氣，連女朋友都要搵個大脾氣既。。。哈哈，禁啱既啫。。。。

谷聚

最近全港熱話何伯何太單野，真係日日有花生食。。。大部份人都幫啲仔女，我當然都係幫仔女啦。有啲男人買疇唔睇價錢，成日亂駛錢，唔好睇禁遠，睇我老豆就知，真心吐血。。。唔係媽咪精打細算，我老豆一早變窮光蛋啦！媽咪識儲錢，識保本，識格價，呢啲全部我都有跟媽咪學。所以。。。我無眼睇我老豆。。。

最近同啲好朋友傾開計，話我個人都幾被動，咩都係迫到埋身先去行。。。轉工大部份都係殺到埋身先去搵工，一來因為運，二來都係無野做啦，就會搵到工轉。。。諗返又好似真係。。。連讀書都係。。。當年會考成績未夠升中六，原校收repeat，點知IVE收我。。。讀大學又係。。。間公司唔掂，要轉先走去讀。。讀啲細course都有啲好似禁。。。最過份真係連感情都係迫出嚟，當年本身對佢有好感既，感動既，我估佢都知，所以佢出手迫我，最終係咪一齊。。。所以我個人真心被動。買樓又係。。。完全無預過。。。整定。。。佛系。。。要來的終會來的，急也急唔嚟。

早幾日約咗啲谷友出嚟食飯，我都好耐無出去谷聚了，一來我多節目，二來我唔係好鐘意出去今酒，同唔知咩人打邊爐等等。。。總之我就係麻煩啦。呢班人無咩特別，話40+，俾我望到其中一條女一定無。。。而且我都應該係全場最細嗰個。。。講返嗰條女，一坐低嗰個氣牆好似箭豬一樣，生人勿近。之後一啲野，佢坐我隔離，我全晚無望過佢，無take care過佢。。。我禁鬼醒，明知條女有事，我當然光速閃開，唔好上身啦，傻既咩。。。最後條女早走，之後佢哋先講呢條女係出面出名，嗰日已經好好了，平時出嚟嬲咗成村人一樣。總之呢條女，小心為妙。。。講返其他人，我相信佢哋比我大，走我企起身。。。原來我唔矮。。。我好身手，靈活，講完。其實嗰晚仲有班朋友撩落bar，但放過我吧，我好怕煙仔味，又唔飲酒，簡單食飯is ok la....下次出唔出？睇時間啦。。。呢期忙。。。

宅爆既我同新朋友食飯原來仲會緊張既，但期望沒有。。。都係同返班波友打波食飯煮飯仔舒服啲，可能呢期我真係需要朋友。有時夜等埋朋友打完波食下飯幾好。

嗰日講完我一直心情都麻麻。。。昨日我拜媽咪喊到收唔到，好彩自己去拜。。。喊得出係好事，一個好既發洩。。。我需要發洩，我需要打波發洩一下。。。至於佢？佢既野我上心既，只係唔俾自己問，唔俾自己理囉。。。會過去的。。。

從今以後

 終於抽到時間去睇了，預咗會喊？最終我喊唔出。。。。上次睇流水落花仲喊得勁。。。白日之下直頭喊到收唔到制。。。好彩我都控制到自己的情緒既。

講返套電影，好寫實，呢樣野聽唔少，由其係同性關係，廿年前識對朋友，兩個有樓，主要都係一個養另一個，同佢哋傾計，佢哋都有講好早立咗遺囑，兩個都有立，都係為保障另一半，當年都有諗既，但我到現在都無另一半呢。。。加上當年資產無現在禁多，所以咩都無搞。到今日。。。最大問題都係層樓啫。。。會俾另一半住到百年歸老既，之後就交返俾阿妹，因為呢層樓係媽咪留俾我哋既最後禮物。所以我根本無打算賣樓。。。

有時我老豆會講，如果我供得辛苦，就賣咗佢，返去同老豆住。。。嘩。。。一來我唔想成日鬧交，二來我頂唔順佢，三來。。。真係見到媽咪既智慧和幫我諗我的未來。真係唔明媽咪點解選我老豆，但無我老豆，就無我啦。。。。

呢幾日我心情都麻麻，我無講俾朋友知。。。由其班波友。。。昨晚都上咗波友屋企食飯，叫做有朋友陪下我，雖然唔知咩事。我唔太習慣俾人知我唔開心，但了解我的朋友會知既。。。見我消失咗，就來問下我。。。我仲記得當年分手。。。我朋友發現我無咩表情，問我咩事，問完就知。。。要搵其他朋友陪下我。。。我哥仲夾咗我上佢做野間 bar度，想隊淋我，但我個人禁理性，點會禁易上當吖。。。佢當然唔成功啦。。。

俾啲時間我啦，我會無事既。。。我知我頂得住既！又唔係第一次，一早已經為自己做好安全網，唔俾自己投入就唔會傷啦。。。既然一早預咗，就應該知個結果。所以從來都唔答應啲好遠既野，由其明知會有這個結果，更加唔會答應任何野。我唔習慣答應咗人既野做唔到。最重要係每次佢講啲stupid things都唔好當真，佢太習慣隨口講啦，聽完係好開心，但其實佢係咪真係禁諗，永遠只有佢自己先知。。。但係我角度，明知好多野唔係佢想要既，就無謂勉強啦。。。 戲言不要上心吧。。。這甜美回憶留返係腦中啦。

本來今日應該返office，但要陪老豆覆診，落到去又俾佢 ee我我，不停趕我走。。。唉。。。我預得時間陪你覆診就唔好嘈啦，煩到爆，我都夠煩啦，俾我靜下啦。。。好彩陪佢覆診，條友真係有吹牛既習慣，又作大。。。好彩我係度。。。連醫生都唔信佢。。。仲話血壓唔高，點知人哋量完鬼禁高。。。唉。。。佢真心難搞。。。我阿嫲都聽話過佢。。。見到我心情麻麻就醒目唔講禁多，由我陪佢。。。我仲記得當年分手，我嫲雖然唔知咩事，但最終講咗句。。。"佢對你唔好，咪搵過第個囉"。。。我真係懷疑我嫲根本知咩事。。anyway, this is long long long time ago...

公司仍然伏味濃，搵工走係好既選擇。。。順期自然？我都唔知，又係無野迫，我真係好佛系。諗返，好似每樣野我都係要被迫再埋牆角先行動。。。乙木真係好煩。。。我媽係甲木， 藤蘿系甲，纏住佢先有好事發生。。。每次我諗唔掂都係問媽咪。。。結果真係會幾好既。

update近況

原來有一段時間無寫blog了，最近都發生咗唔少野，想記一啲，都需要抽啲時間記一下。

我的安全感來自我的預算，我一向都預得好準，因為我習慣都有幾手準備。我知我有啲佛系，好多野都隨遇而安，順期自然，但我知，其實我心中有預算，所以我可以佛系。

要來的時間終於要來，今次唔再當面講了，send了個msg，就轉咗個mode，咩都唔想理，唔想知。真心好累，好多野都放心上，但理性的我，應該一早知有呢一日。只係時間的問題，重遇的第一天都知道，所以一直都迫自己唔好禁投入，唔好禁上心，係泥足深陷前必須抽身。既然佢搵到，就無必要再打搞佢了。有女神一個都夠了，唔想再有另一個，講曖昧，den一個都夠了，起碼我哋知對方底線和條界係邊，而且den真心了解我。所以。。。適當時候應該要放手。講真，有時遇到啲占卜都有講佢幾適合我，但我唔係人哋要既野呢，我亦無必要勉強人哋。或許今天我放手，會一世都遇唔到，但勉強人哋我做唔出，破壞人哋我更加做唔出，我唯有適做哋離開吧。

唔講佢了，呢個話題應該完結了。講工作。有時很忙，有時有點得閒，得閒就溫下書，但進度好慢，可能呢期好多野煩，好多野諗，好累吧。有搵工，但無次前禁急，我都係佛系性格，殺到埋身再算。

最近睇咗套電視劇 《瑪嘉烈與大衛-絲絲》，我真係好似大衛，愈睇大衛愈想打佢，但睇返自己，原來我同佢一樣，有點佛系，唔想去搶，深信係我的，總會回來，唔係我的，點追都無用。其實真的，我被暴龍感動唔係佢啲禮物，而係佢為我無條件主動幫我解決啲令我困擾的事。我好記得。

講起佢，我昨晚發夢諗起佢。。。我深信我同佢的故事已經完結，應該完結，我信我的感覺和感應。

最近屋企都煩，一來有個好煩的老豆，二來真係好多事情需要我處理。。。媽咪講得無錯，真係唔好指意我老豆，因為佢真係太廢了。。。成日都要人執屎，有時阿妹想我陪老豆，我咪去囉，但返到去陪佢，又不停俾佢鬧。。。我真係會覺得煩架。。。

早兩日公司有個talk講照顧者，入面的內容令我諗返起照顧媽咪的時間，我知我老豆好大壓力，呢啲壓力來自佢自覺對媽咪的虧欠，但你有壓力都唔駛搵我出氣架。。。由細到大都係被出氣既對象。。。我都會有頂唔順既時候。。。但當日我只係諗住，想媽咪好過啲，頂住！一頂就頂咗九個幾月了。或許到今天，我係他眼中都係廢人，但我知我係媽咪和阿嫲的心中，我是最好的，最令人放心的，因為我理性，eq又高，仲有聰明!

累了就應該休息。。。要好好休息！

得閒搵啲野睇下。。。我真係好習慣用1.5X 2.0X去睇。。。有時朋友上嚟我度見到都話我痴線。。。習慣咗唔好浪費我時間ma....太慢真係唔啱我。。。

估算，奇準！

小慧話我天生食呢行飯。。。做data analysis...都係啲分析野，平時自己估野禁鬼叻，仲勁過楊天命呀 !!哈哈....唔好笑我啦。。。。

又唔係既，我都係跟據一啲history和小小數據嚟估，我都唔肯定有100架，我只可以話有90！

無呀，又俾我講中，我放手，嗰個就有了！你話係邪定係我太準呢？我信我預言準。。。佢有啱既，點都想祝福佢既，我從來都知我唔係佢杯茶， 與其勉強，不如早啲放手。我知我衰架啦，話放手，但又仲理佢，唉。。。我會檢討一下架啦。

佢嗰日話俾佢ex話佢亂用佢簽名，我都估係幫嗰件野加張咭架啦，真係估到，我都話如果我知，我一定會叫佢唔好。因為我見到個將來，又俾我估中。我今晚先講，嗰隻野唔夠細心，成日整個氹佢踩。。。條八婆又要傻仔到真係踩落去，最終食晒。。。哈哈，佢要自殺，唔通我唔俾佢咩。。。

我既估算勁，係原自我媽既遺傳，加上我對數學既天份，當然八字都唔少得啦。我水多，個人聰明，心水清，所以好多野唔駛人講，我都知。最勁係當年同暴龍，佢唔講，我發現晒。。。哈哈，呢個都一樣，唔講，其實我知，仲要諗住呃我，哈哈，你太睇少我既能力啦。

今晚佢講到佢自稱自己有魅力，可以溶化人哋，哈哈，或者啦，但唔會係我囉，我堅持既話，我出晒名硬頸既。

我應該之後都少見和少聯絡佢，我知我極度野火，我都唔係第一日架啦，我知我自己事，所以我都唔想將佢推去一個死位。正如我同den之間都係。。。佢知我野火，但我同佢又有聯絡，所以佢會整啲少聰明囉。

今晚佢講得啱既，要放手先會遇到下一個，但我真係對識人無咩興趣又無咩動力，放過我啦，好嗎？由我孤獨啦。我只係想專注事業和打波，其他我咩都唔敢諗。

工作好忙，好累，我只想好好休息。

十幾年第一張合照，可能係最後一張。 。。我未必想再見佢，好嚟好去，今次見完，食完生日飯，就應該完結了。俾啲時間自己。。。成熟啲，聰明啲，愛自己啲啦！

專一？根本懶！

早幾星期同朋友食生日飯，一月生日，拖到二月幾先食，又要等佢女朋友返夜先可以兩條友出嚟食飯，傾下計，吹下水。

 其實我身邊既朋友擔心我，我知既，我fd都問我有無出去識人，其實我無，我連啲group聚都唔多想出去，有啲人傾咗陣計已經唔係好想再傾，感覺係唔啱傾囉。。。 識我好多年的朋友好多都知，我除咗係一個野火既人外，仲係一個killer，或者我已經對愛情無咩幻想，所以都唔想諗了。

其實我都唔敢諗愛情了，要習慣自己一個人，努力工作吧。其他都唔好諗了。

我知我同女仔傾計既能力無咩點變，落到球場和係公司識朋友都無咩問題，所以都應該係我唔想出去識啫。。。唉，遲啲先再諗啦，努力工作啦。。。

我媽好多年前有講過我，成日食嚟食去都係嗰啲野，都唔轉下口味既。。。係。。。早兩日同同事食野，我諗都唔諗就叫肉醬意粉。。。哈哈，去茶記一係火腿通粉，一係就沙爹牛通或麵。通常都唔會改架啦。。。哈哈，一係個人懶，一係就係個人專一。我相信係前者。

今晚偷雞落去試下，好彩無咩事，唔敢追波，只靠技術，夠打夠用了。但都要小心啲，唔好亂嚟。再整傷就煩了。

我又唔記得增值了，51148274嗰個電話拎唔返了，由佢啦，反正無咩野連住，我keep返現在另一個電話就算了。如果講靚電話，我記得你當年暴幫我拎嗰個堅靚，但我已經唔記得咗咩 number了。哈哈。

又整親。。。

星期日同啲朋友去行山，朋友講明係平路，易行既。。。無壓力行。。。最終。。。右腳膝關節腫晒返嚟。。。搵物理治療師睇完，佢話我過勞拉親。。。

班波友叫我去，本來我都唔想去。。。嗰日係佢生日，我根本無打算同佢慶祝，我又唔想一個人太悶，所以答應咗佢哋去行，點知公主甩我底。。。 -.-"

嗰朝好早就出發，我離港前send happy birthday俾佢，估唔到佢真係打俾我。。。唔好搵我啦，你去搵你既幸福啦。。。我知我唔係你杯茶呀。。。其實最近我都多野諗，所以夜瞓。。。同車個波友又唔通氣，總係要講啲會搞到我喊既話題，又唔醒水轉話題。。。唉。。。好彩忍到。。。一講我阿嫲阿媽就嚟架啦。。。我認我眼淺。。。

食完個午餐就去行虹橋。。。只係石屎平路。。。行到尾。。。膝後面開始腫。。。我都知知哋出事。。。食完個晚飯就坐車返香港了。回程我一個人坐，上車瞓死咗，瞓到一半，我feel到有人坐我隔離，原來係個女仔係中間站坐我隔離，望落ok既～

返到屋企，右腳後面條根腫晒。。。點搞都唔掂，剛剛我改咗星期二物理治療，阿醫師睇完就要我呢個星期嚟多日，唔立即搞就好麻煩。。。仲搞到隔離個病人俾粒止痛藥我。。。真係型。。。搞到禁多位，我真係唔好意思。。。今年都唔行山架啦。。。收山和所有危險野都唔玩架啦。。。邪到爆！臭豆腐真係唔係講笑。。

我fd第一晚開咗啲藥俾我。。。食完唔知係我本身唔舒服定係藥既副作用。。。發燒又發冷。。。我仲以為自己就死。。。又係禁發冷。。。真係驚。。。見我仲寫到野，啫係無事啦。。之後個fd先俾啲胃藥我，叫我食止痛藥記得連胃藥食。。哈哈。。。下次早啲講啦。。。我胃唔係好得架！

做咗兩次物理治療，已經好咗好多了，行到，少咗痛，無咩拉住，不過物理治療師叫我呢兩星期唔好發力。。。。er....er....er...啫係叫我唔好行啦，難啲。。。就住唔好玩突然加速囉。。。而打波。。。唔好追，慢慢嚟。。。放過我好嗎。。。。

又月尾，工作又開始忙，有啲底，叫做好啲，順啲，希望今個月好啲啦。

講到咁最後都係想講佢。。。今年佢生日，我都忍唔住送咗件生日禮物俾佢。。。好細份架ja...我知我身份唔應該送好大份俾佢，所以。。。我諗咗好耐送乜，我記得佢有講過佢需要髮夾。。我識條鐵咩。。。問下ceo，自己又上網研究下，本來想d記俾佢，但我身份實在太唔適合啦，所以睇一部日本既，但日本嗰部堅白痴，要叉住電用。。。尿袋都要叉住用，禁我買叉電款嚟做乜？最終見到有部套裝又大牌子，上網睇過ok既，就買嚟送俾佢。。。我買既真係希望佢有需要而合用的。

都決定咗離開，其實我唔應該送生日禮物俾佢。。。已經盡量㩒住自己，唔好禁快回佢，唔好禁熱情回佢，唔好睇佢既野，要學識放手，要戒佢。。。到底我迫自己做到幾多？有時夜晚會記起佢講既野，但我要自己記住，佢成日都都隨口噏，唔好當真呀。。。唔好俾希望自己呀，根本第一日就知佢介意啦，所以唔好有希望呀，為咗佢好，放手，推佢去搵個佢鐘意既人啦。

講開，其實我都幾野火，啲朋友既另一半有時會驚我去搶佢嗰個。其實我唔知一次有朋友講，我仲好過佢老公男友另一半。。。最記得係女神同我講呢句，那刻我知。。。我唔好太過熱情啦。。。唔好俾人知，唔好出事呀。。。

有人話人馬既靈感力好強，咩都知，直覺又準。。其實人馬係觀察力強，我知，唔代表要踢爆你。我要知既野，從來都會知，呢個係我既能力。所以呃我既，只係吹既，我其實知既。。。

不安全感

 今日係元宵節，我答應咗雨仔會返嚟陪佢。。。最終真係做到，但佢又落小小雨，哈哈。

今日成就解鎖，自己走去包湯丸，幾耐無整過？廿幾年？三十年啦，以前細個阿嫲要整，後期就買，細個有幫手，所以仲記得下點整既。。。今日用返阿嫲既方法整。

今日我終於拎返晒所有野俾佢，有份少少既生日禮物俾佢，但我唔打算約佢食飯了，我都唔打算見佢，我想放手，決定放手，就要放手。唔想再拖落去，希望佢一切都好啦。都禁耐啦，從來都知我唔係佢杯茶，所以早啲放手啦。

我知道我愛一個人，可以好耐，一早唔迫自己放手，根本自己放唔到手。我愛得最耐既人，一定係女神，三十年。。。真心痴線。但我知我無可能同佢一齊，所以我唔俾自己成日搵佢，但我知我成日借啲依搵佢。。。只要唔破壞佢生活既話，應該可以，要記住，唔可以破壞大家的關係。

之後仲有無？每一個鐘意既都係強迫自己離開，所以先放到手。。。這是命？還有den...最終發覺真係唔work呀。。。試咗。。。但我都係以唔破壞佢既關係大前提下做唔朋友，佢知我知要點做。

數下數下，這十年，真係得佢。。。係生活？經歷？定係我根本唔敢再愛？唔想知你，唔敢諗。我只想用工作和打波麻醉自己，搵朋友陪搵唔到禁多，所以。。。要學懂孤獨。

我feel到有啲朋友想試下幫我同另一個朋友試下得唔得。。。但相處完，我真係頂唔順啲人慢，搞唔掂。。暴算同我最夾，佢快得嚟又夠爆。。。仲好錫我tim...但過咗去就唔好諗佢了。。。如果再遇上，我都唔想同佢一齊。。。

講了解我，我諗阿den係最了解我，起碼佢真心知我諗緊乜。。。我做啲咩，諗咩，有時唔駛講佢都知。。。最鐘意走嚟錫爆我既！

最近我都唔係好知自己諗乜和想點，捉唔穩既感覺係因為估唔透。有啲事情係預計之外，所以有點不安。我習慣有預算，有預計，所以會安心。終於知自己點解感覺唔好了。

剛剛過咗十二點，佢生日，我記得，只係唔想禁早講生日快樂啫。。。我咩都記得。。。只係唔俾自己做啫。要頂住。。。雖然佢講既野我信一成，但我諗我都係唔好去錫爆人啦。。。

這刻我又掛住我媽。。。我想好愛好愛佢，我想對佢好。。。好想。。。有人話選擇對象會有啲戀母情意結，或者啦，可能係前世情人吧。

對自己好啲好嗎？

 龍年新開始？其實一早應該要做啦，要加油，頂住呀！

講下工作，呢期暫時都ok，但係唔好禁開心，真係要搵定工好啲，雖然唔知前路， 唯一可以做就係交俾神。。。個感覺係捉唔穩，完全唔知可以點。

近期我好似打好叉多波，有時有朋友約我，但連續幾日打真係唔掂，唔夠體力，追波嗰下自己都知。。。我都係 enjoy個過程啫。。。

講咗禁多其他野，我諗我最想講既都係嗰啲啦。唉，我都唔知可以點講好了。上回講到邊？講完嗰次之後，佢話當我無講過。。唔當我講既野係野，但我真係認真架。都明知無可能既，不如自己做返好自己，要戒佢！唔理佢啲野，唔睇佢啲post，全部所有都唔好理，真係要抽身，唔好再俾自己沉落去啦。戎毒都要戒呀！

自己唔鐘意佢咩？唔係，我認我緊張佢既，只係我知我無資格囉，而且我知我唔係佢杯茶，何必勉強呢。

最近我少咗覆佢 msg，又少咗聽佢電話，我知有人對佢好，所以我更加要退出啦，我一向都野火既。。。不過佢同坪洲既關係愈來愈差，坪洲唔願搬走，又話要溶化佢，話可以幫佢做乜都得。唉，何必呢。。。人哋當你兵，何必做到無咗自己呢。而且呢個，我一早就估到易請難送，真係俾我估中，唉，唔好成日俾我估中好嗎？

有單野好笑，坪洲點佢點解唔可以好似對我禁對佢。。。頂！又隊我上枱！我知我係情敵呀，我唔要啦，送俾你啦！佢戒意我好想多野，呢啲野唔係我可以改變到既外在條件，所以我唔會勉強人哋，我唔會爭架。。。放過自己好嗎？

其實我唔想講太多我同佢既野，因為我都唔知可以點講好了，好累。。。我知我要戒毒，我知我要為我好，我知我要還返晒啲野俾佢。。。今次唔好再欠佢野啦！

佢就快生日，我無打算約佢食生日飯，我都無打算見佢。。。放手好嗎。。。

做兵？

最近睇咗一個節目，講兵仔的生活。雖然只係好短的片，但都夠我諗了。。。可能睇返，我都只不過係一隻兵，娘娘收唔少兵。。。啲兵真係幫佢唔少，多我一個唔多，少我一個唔少。。。所以我應該放手了。。。

最近好忙，成日做到一點，又唔夠瞓，好累。。。一來夜瞓，二來真係多野諗。唉，頭痛。。。

就快新年了一，我啲朋友叫我放桃花係屋企，話旺下姻緣。。。我姻緣真係弱。。。水多掛。今日有朋友問起我既要求，我又記返起嗰時ami講既野，脾氣大，工作狂，固執，硬頸，仲要係戌土，唉，幻覺嚟既啫，隨緣啦。我知佢一定搵到的。

今日agent打俾我，原來hang seng既interview改咗時間，改咗星期四既朝早，我應該都係wfh，未同老細講，但都應該係了。hang seng份工係contract，仲乜叉都無，呢啲我真係要諗，不過都係見下先算。再諗啦，個agent好主動，好想做成呢單生意。而我都係兩睇。

累了，早點執野，早點休息吧。

想記就記，就新年

 雖然好忙，但都總係想寫下記下一些事情。

今晚睇電視，講ai還原死咗既人既聲或者片，又觸動我的回憶。呢件事，有好有唔好，但對我來講，唔好啦，我好努力壓抑咗自己的傷痛回憶，唔想再拎返出嚟，所以，我唔想要囉。

呢幾日同佢傾計，果然同我留意既野一樣，真係有人追，佢對人無意思喎，話人哋太man...哦，其實我知。。。佢想要女仔，所以我知我無條件ma.... 但其實佢比我更加男人，好麻甩呀！只係得個樣女仔，佢同我剛剛相反，哈哈，起碼我有啲野真係好女仔，所以有時啲波友真係會當我女仔。

講返追佢嗰個，佢唔想要人，但佢的回應又好似同講既唔同，呢點同den真係有得比架。den 呢啲真係唉。。。唔想理，只要唔好搞到我就得啦!

呢期工作好忙，啲野趕住過年前要交，所以玩到on call 36一樣，真係好那痴線！但我老細啲樣真係衰到一個點！唉，算，做好自己就算啦。

不如又去返佢個話題，佢日日話坪洲，成日講坪洲唔好，禁坪洲又真係衰既，真係難搞。。。條友又唔想搬出去，總之兩個都麻煩！我都唔識講，不過坪洲同我住，兩日就爆炸啦。

而我對佢點諗？佢又好似當無咗件事一樣，我唔係無咗回事囉，我要戒對佢好架啦，好多野都要戒，底線三月，等佢二月過咗生日先算，但我知我一定要放手，一定要戒架啦，為佢好，為自己好都係啦。

我個人好理性，又聰明，又醒目，所以我唔鐘意問野，我要知我 一定有方法知。以前暴龍啲野我唔問，但其實我好多都知。有時觀察就知好多野，唔駛問既。

講起口不對心，我睇咩人，我未必會答全部，但我唔係一個難睇既人，我仲要唔識講大話tim。。。所以有時我情願轉話題!

煩惱。。。。

 最近其實好多野煩。。。工作煩，生活都煩。。。總之樣樣都係停晒係度，解決唔到禁既樣。其實我好討厭這個狀況，超討厭！因為控制唔到，好多unknow....朋友總係話，只要你唔當佢係一個問題，佢就唔會係問題啦。。。其實係。。。我自己攞嚟煩，根本係唔理佢，唔好對佢任何野上心，就唔會煩。。。要迫自己放手，要迫自己唔好對佢啲野上心，要迫自己唔好理佢，一定得既，又唔係未試過。。。迫自己，加油 。。。

工作係有時忙，有時好閒，閒時真係諗下增值，係公司叫做學多個software，跟住想考多個牌。嗰日聽CEO講，佢老公和個仔做 IT，真係不停要考牌，不停要進修。其實我好懶，夠駛就算，我無咩進取心，有時只係身邊既人push，或者見到個環境必須要轉變先會去做。。。迫我嗰個已經唔係度了。。。其實無咩人可以迫到我。。。呢個真的。今年想考pmp，有啲啲計劃，諗緊，未行。

老豆成日話我都唔知忙乜鬼，只係知我忙打波。我真係忙，除咗忙打波外，工作一時間忙，有時係屋企，總係忙住搞好多野，好多野想執，好多野想整理，總係唔停禁搞好多野，所以。。。我真係忙，唔知忙乜野。

最近發覺自己成日整好多野，但又食唔晒。。。天氣凍，就唔想整太多。。。唔多都係打爆咗個雪櫃，真係要收手啦。。。朋友話我呢啲係減壓，整野食時減壓。。。或者啦。。。

嗰日個fd問我係咪有心事。。。講真有心事我都唔知可以點講，有時有啲野係自己一衰，講咗無限禁多次都仲要死埋去。。。要迫自己抽身，要夾自己，要管下自己。。。這刻我只想收埋自己。。。累。。。，

好彩我仲有呢個地方，無人睇，可以隨心寫啲野，只要我想寫就可以了。

呢幾日好凍。。。我總覺得我總有一天係會凍死的既。。。

聽日公主吹大雞食飯。。。安排咗打波，但我俾人爭到。。。放過我好嗎?

昨日佢話佢朋友發現佢有四個酒粒，雖然好淺，但都係有。。。我想講，有酒粒真係破相嚟，個運真係會差啲，真係唔好恨。。。仲有就係。。。啲人成日話呢個係前世記憶，用嚟認住前世既情人。我諗我前世都真係欠幾多人既野，今世仲有排還。。。應該未還晒。。。仲有就係前世既情人，或者已經遇到了，只係時間不對，巧合既野，真係多，只係時間唔啱。。。

講多樣野，我愈來愈明白我同坪洲到底差幾遠。。。好叉遠，只係講處事，佢又唔夠細心，又唔識為佢著想，真係唔知可以講咩了。二來佢真係唔了解佢，佢一講錢，就好醒架啦，有時我都費時同佢嘈，認咗佢算。。。但我態度會好啲，起碼我真係會醒既。明知佢趕時間，就唔好阻住佢當幫忙啦。。。。幫唔到手仲要搞到佢。唉。。。唔識講。仲有一樣係。。。。日日俾人鬧都仲要唔搬，唉。。。我早就走咗啦。。。唔走都會計劃定走，人馬點都有啲計劃先安心的，所以人馬聰明唔係無理由架，只係。。。人馬有啲自虐癮。。。總係要搞到自己受傷先安樂。

人生無常

 今日突然收到一個消息，我大學同學突然走咗。其實當年讀書都聽過佢有啲病，又有做手術又有食藥，詳細無問太得清楚啦。畢咗業後，都好似見過一次，有係 fb睇到佢既近況的，早幾日明明仲見佢有出post，原來已經係最的一個post。

收到消息後，我只係通知熟啲的同學和老師，我無打算去，老師和有啲同學會去，仲問會唔會聚下。其實嗰晚我有波打，而且白事我都少去為妙，為咗老豆既健康著想。

最記得嗰個同學有次考試出貓，無啦啦跌咗張貓紙落嚟地下，我同另一個同學見到，真係唔知好嬲定好笑了，我同學嘗試踢返張貓紙俾佢，最後大家都安全。但呢單野，真係記一世呀 !

其實今個星期頭我都收到校友會副主席兩公婆燒炭自殺死咗既消息，我第一次睇新聞都估緊係唔係，原來真係。除咗有啲行政野要做外，其實聽到我心情都麻麻。個副主席雖然唔算好熟，見過幾次面，傾過幾次計，佢服務學校多年，又係校友，所以唔多唔少都會識既。

當年起會章，我係預有人會辭職唔做，所以先寫條出缺出嚟，估唔到今日居然會用到。

一連兩單野，我心情當然唔好啦，又加上阿嫲死忌，四年了，那份痛如昨日的痛。我仲記得阿嫲走前，其實阿媽已經出咗事了，我仍要扮無野扮開心氹阿嫲，因為唔想佢擔心，又唔想佢知。但其實阿嫲應該估到，我扮開心個樣，都係死頂出嚟。阿媽仲係ICU，點扮無野？我只係知當我一個人時，我就唔需要再扮開心，扮無野，可以盡情發呆。但傷心的心情是需要時間去消化的。

其實今日我都係唔係好開心，一來朋友的事，二來我自己的事。我應該俾返晒佢既野佢了，佢無野再係我度了。應該完結？應該無野再拉住？嗰晚講完佢唔敢再打俾我，佢話驚喎。我都諗返我有無衝動到？其實無，諗咗好多個月啦，係腦海中都排過無數次，反應都係預計之內。講到尾，我都唔係佢杯茶，早啲放手都好既。但佢唯一一個反應係我預計之外，就係佢估我怕拖。。。講真，我都係一個非常揀擇既人，好多要求，但我唔同佢，佢要外表，我唔太係。。。加上我已經對愛情失望了，唔敢再去愛，所以都幾難有拖拍。唯一同自己拍拖囉～哈哈～

佢仲係外地，我唔敢亂講啲乜野，我唔想影響佢工作，但佢今次的行程都順利，加上無再搵我，我當完架啦~ 唔見架啦~ 俾埋份 report俾佢，正式完結晒所有野。

所以我心情唔多好，只想又收埋自己係間屋就算！加油，一定撐得過去架!

林蛇返咗嚟呀!

 近日林蛇返咗嚟，早幾日見過佢一次，佢情況好咗好多呀～今晚同校友會班朋友出嚟食飯，大家好耐無見，傾得好開心，傾咗好多野，大家都好盡興。

今晚同kit傾咗幾句，講起公司啲野，講到我公司啲老細只係識鬧人，不停鬧人發洩，完全無諗過解決咗事情先，唉。。。其實呢人生活只有工作，無其他。唔駛太上心佢哋講啲咩，只需要做返自己。諗真啲，真的，我老細鬧完又鬧都係差唔多既野，所以佢其實只係為發洩吧。

我哋打波既人，因為運動，所以有地方舒壓。由其當partner打得唔好時，唔會鬧人，只會不停鼓勵別人，希望俾多啲信心人哋，打好啲，我support少啲。打波可以舒壓，又可以學懂人生道理。

其實呢度工作量真係一時時。我呢幾日堅得閒。。。。只要佢啲野唔好集中一齊嚟既話，應該會好啲。

終於講咗了。。。放手，對大家都好

終於講咗了。。。但佢好似唔接受。。。唉，我都唔知點講好了。。。累。。。我認真講，佢當我講笑，仲話我自己鑽牛角尖，仲話唔做得朋友既。。。佢仲問我想佢點。。。唉，我邉叉知點答啫，我只係知我想放手，我要迫自己唔好理佢，要離開，俾佢有空間搵個佢真正鐘意既人。。。可能我一相情願掛，我信命，我知我條命係禁。阿慧成日話我好討厭自己，成日要迫自己埋牆角。其實係架，成日都想人哋好，情願自己受。

唉，前面係點，我真係唔知，我只係知見步行步。

佢有問我係咪因為坪洲，我話唔係，佢無野比得上我，我做咩要呷佢醋。又唔夠我靚，又唔夠我細心，又唔夠我聰明，禁佢憑什麼？哈哈，我講完都佩服自己，那來的自信。

其實我驚佢估到我想講咩，我成晚都盡力控制自己，盡力做好啲，唔好俾佢發現。我已經做得好好了，起碼佢無發現啦～我無啦啦講呢啲野，佢都估唔到，其實係，雖然我真係諗咗好耐。不過俾返晒啲野佢，起碼我心安樂先，無野欠佢，今次真係無啦。佢條舊鎖匙，我到今日都搵唔返。。。。-.-"""收得實在太好啦。。。。

放心，我無咩事，係唔開心，但起碼解決咗一件事，情緒會好啲啦。

update工作和其他

又係時候想寫下野，最近心情麻麻，一來為工作，二來又為感情，其實好多野煩，好累。。。好想所有野都解決，但似乎不似預期。

先講工作，我成日做錯野，又唔小心睇唔到，成日俾老細鬧，又唔準時交野，又唔交代，總係做得唔好，唉，我都唔知可以點了。想搵工，但好似個市麻麻，聖誕前都有啲agent搵下我，呢幾日完全無，又無interview，總之就靜啦。不過佢決定炒我既話，我都無計，唔做野半年都ok既，不過支出真係要就住。一份工要做到有情緒病，真係。。。。唉。。。嗰晚林蛇先分享，要放手，放開先可以遠離情緒病，唔放下，永遠都只會係嗰個位度轉。佢講呢樣野，我感受到好深，我知我都差唔多，只係無佢禁嚴重。我都驚架，由其最近柳爺自殺死咗，佢好似好正能量，但小慧成日講，我有咩事，佢點算！我知，我唔可以俾自己有事，因為阿慧係我裏面，只有我存在，佢先可以存在。

不如講下感情，講啲簡單啲既野先。十二月同小慧食飯，得兩個人，好興奮。今個月林蛇返咗嚟，又同小慧食飯，我拉住佢隻手 ，嗰下真心心跳。同佢相處，我都係要扮無野，同埋唔好太揚俾人知。。鐘意咗佢三十年，原來真係放唔到手。。。不過佢屋企都好多煩野，佢自己都要面對好多煩野。我同佢都唯有交俾神啦，我哋都無能為力，等待神的安排吧。

又講下佢，原來我同佢個女既日元係一樣，呢啲真係1/60既機會。。。31號嗰晚佢上咗我度打邊爐，之後唔理我，出咗去同車會啲人睇煙花倒數。我激到爆炸，當然我唔會鬧佢啦，只係心淡和失望。我一號唔聽佢電話，佢仲將個責任推返俾我。。。嘔血。呢期仲少搵我。我決定咗同佢講清楚，係唔習慣架啦，不過真係要做，對大家都好。我感情緣係差架啦，不過。。。無計啦，我自己都知我係禁架啦，加油呀!!!

要正面啲，加油呀!