2018總結

又到了寫2018總結的日子了，又係時候細想一下今年有什麼總結。落筆前再看看自己寫的2018展望，到底做到多少呢？

今年除了必要和打波的時間，真的盡量抽時間返屋企食飯，有時一星期唔止一兩日，有時三四五日，盡量抽啦。但真的，返屋企食飯真係幾悶，因為食飽無咩野做，自己檔野要做的真係唔算特別多。或許要計劃一下夜晚食飽飯有什麼可以做，最少真係去練下步法練下手法都好啦.....好過坐係屋企唔知有咩搞好。

工作的事沒太多的特別，機會是多的，都是學習和試練的機會吧。年中換了老細，咪哥升咗去第度，心姐又考到SOII，年中真係好忙，要食晒心姐的大部份野之餘，又轉老細要再習慣過。雖然辛苦，但都總算頂得過去，順利交接。而我都功成身退了。。。或許。為什麼是或許？因為新的同事....有點＂可愛＂，是傻得有點＂可愛＂。或許太新，或許處世不多，或許唔夠聰明吧。Anyway，盡力做。我大老細成日話好满意我的工作，可能係面試的原因吧。Anyway，面試真係要講運，希望今年好運吧。舊年運氣仍不夠。

我份約二零一九年五月尾就完結了，之後怎樣我也不知道，我只知....我會去個旅行吧。其他就由神為我安排啦。我強求都沒有用。

或許之後會考慮返SAS或者主力對數字的工作。今年用SAS的機會下半年比較多，自己寫，自己改，重拾當年的感覺，這感覺真好。

身體方面長期受傷患困擾，沒完沒了。仲做緊物理治療，少痛還有，只希望快點完結吧。因為傷患的關係，完全影響運動，有時想發力都唔可以，打波要就住，唉。這是經歷，要有智慧點面對。

財政方面算穏定，無買太多的野，只係換咗部電話，買咗部電話俾老豆，其他都唔算駛好多錢，算可以吧。不過年尾爸爸可能又要再通波仔，現在都係等睇報告，交俾神吧。至於間鋪呢....清咗一部份舊貨，暫時仲有些舊貨係度，目標都係想清舊貨，新貨都要睇賣唔賣得再入。但主力都係想做返運動野，或者運動有關的野，希望2019會好少少吧。仍然未換相機，都係那個concept，換咗d必須品先，其他非必須的就等下先，再諗下先。

愛情仍然空白。期待愛情，但看似完全無動力，或許仍需主動，或許已習慣單身吧。想放棄，但友人仍然不想我放棄。感謝各方好友的支持。

校友會換咗屆，好多事情都沒有改變，有些位置換咗人而已。但上半年同學校的衝突比較多，不满一號的指數不停上升，到九月最終都搵校監傾過個問題。但問題看似解決了，但其實一點都沒有！之後點行，之後再算吧。只係我從來都唔喜歡玩辦公室政治，非常討厭!

年尾發生的事特別記得，有件事我總是想不透。或許我從來都無太多的事情需要唔俾人知。無許點唔俾人知，只要發生過，總會有人知的。好多好多的事情，我都唔需要講出來，只係身邊的朋友唔問就算了。所以朋友唔想佢的現況俾人知，呢下我真係看不透！Anyway，從另一個角度睇係好事，因為兩個女人唔駛再夾住我係中間問來問去追來追去，勁煩!

寫到尾總結2018有開心，有唔開心的事，最重要係調整自己的心態，凡事盡力不後悔。幫到人就幫，唔好太計較得失，平凡是福。

2018 展望

寫完總結，總需要去寫展望。人愈大，展望愈簡單，不再追求什麼名利，只想一家人平平安安，身體健康就夠了。

屋企三寶已步入老年了，身體大不如前，可以做的盡量做，控制飲食，盡量抽時間陪和處理家中各事都夠我忙了。家庭永遠都放在第一位。2018無論工作有幾忙，有幾多野做到好，一星期總希望可以抽到一兩日回家中食飯吧。

工作的事情，從來都不是我可以控制的。SOII還未有結果，盡咗自己努力了。平時係公司都係做到的一定做，做唔到的我都無辦法。但願工作一切順利。我亦需要為自己的前程打算一下了，如果考唔到SOII，是留下，還是出去做返budget management 的工作？我喜歡管數，喜歡控制成本，喜歡拆彈，所以係呢方面發展一定可以的。

身體方面，只希望自己無太多傷。小病是福。年尾右手手掙痛....估計係打overhead時手落返來那一下動作做得太差所致的。而身體其他部份問題都唔大，只係一直都係.....病下停下再病下.....保重吧。

財政方面真的太懶了，說好的管理好自己財政的事，完全無時間搞。阿妹仲提議我去起返個投資戶口，我都未有時間，手頭上的股票，可以放的，盡量放，新股就最好抽完放晒佢了。2017投資方面唔太順利，希望2018可以好一點。但我都係保守型，盡量唔投資高風險產品。

理財方面已經買少咗好多野，想換相機講咗好多年都未有行動。睇中部二手，但係都未有行動。生意方面因為carousell 的興起，賣咗好多唔等駛又舊的東西，都算係一個好的開始。希望盡快清晒d舊貨。2018加郵費，變相profit少咗，禁就不如減價cut包郵，禁做應該仲有數圍。

運動方面，羽毛球技術係2017年總有點進步，希望2018年更加進步，由其步法，加油!

寫到尾，又係寫愛情的時候，沒有期待，沒有期望，可能成果更好呢～靜待神的安排吧。

總結2018展望，一切靜候神的安排吧。只有更愛神，把一切都交俾神吧。Thanks God.

2017總結

每年過咗生日就開始著手動筆寫每年的總結，每年寫總結前都會回顧一下一年前自己寫的展望。

2017年，平淡的一年，有喜有悲，要我用些形容詞來形容，應該是學習年。

今年最終都無考到PMP，出年PMP又轉課程，到最尾考唔考都真係未知之數。但PMP教懂我的野，今年大多都可以用出來，無論在工作上或個人的事上。沒有考試是有點可惜，但學到的比得到的多就應當感恩了。

工作上變化不大，唔駛轉工我已經感恩了。工作上的機會有很多，或許未必每次都能把握機會，但盡咗力就夠了。與同事間的關係好咗，可能大家接觸多了，還要記著一件事　－　謙遜。雖然自己真係好叻，但這世上還有人比你更叻！經驗的野，你有條鐵咩....學野啦，細路！係政府做野，唯一一樣野好係無太多的壓力，慢慢做，把生活的節奏放慢一點，唔駛跑數，又唔駛趕得好緊要，一切都慢起來，對我身體來講係一件好事，所以目標都係政府工作。私人工仲諗唔諗？時時刻刻都想，那份挑戰拆彈係政府工好難俾到你的。但人大了，需要穏定的，每日都有挑戰，心臟未必負擔得起，還是安安份份做份穏定的工作吧。

今年亦有機會interview SOII，結果不知道，希望是好結果吧。今年interview時問中我的工作，Online Questionnaire 對field的同事是好是壞。我把我的經驗都放進入去，希望今次可以成功啦。

運動方面，今年的羽毛球技術明顯進步咗，步法都好咗，但狀態真係一時時，自從十一月中病到十二月頭病完都仲未夠氣打，都仲有少少咳，希望再休息一下會好返晒，足以前禁跑得啦。但傷患永遠都係運動員的天敵....網球手就係年尾發現了，希望快d好返啦....

今年十一月校友會搞咗個晚宴，呢個晚宴我花盡心血都搞，可惜個個幹事都話唔得閒，一係就幫唔到好多手，大部份野都係我一個人做，真係做得好辛苦。晚宴係成功的，當晚的回響都不錯，只係我身體已經頂唔住了。都三張半啦，再不是十八廿二，係時候考慮退落來的事情了。出年仲會唔會係主席？真係要好好考慮，感謝各位老友的支持，今次真係look盡人情咭，感謝各位，感謝神的保守。

今年好開心可以同媽和妹去東京旅行，東京好唔好玩？ok啦。旅行開唔開心？當然開心，但真係好鬼好鬼疲累.....堅累.....係我的問題定係身邊人的問題？一定係我問題啦。。。哈哈...期待下次再去玩呀~~~唔好要我禁辛苦就得了，今次係所有野迫晒係同一時間發生，真係人都癲呀。

Shop的生意一般啦，有時突然爆好生意。有時可以清到舊貨都好開心，Anyway，現在定位係享受做生意呢份樂趣，唔好俾太多壓力自己。 我做生意有我的原則，只要記住那原則行就可以了。

爸爸的身體大不如前了，有時心臟會痛，會唔舒服，但暫時來講唔需要做手術住，十一月頭照完CT，暫時無塞，但都需要小心留意一下。而阿嬤身體就一般啦，年頭成日入院真係驚，年中都可以啦，間唔中出出入入醫院真係驚的。我可以做的都已經做晒了，屋企set晒cam，希望佢係屋企都安全啦。而媽咪就肯戒口，血糖和血壓都可以，又每日行運動場，鬼禁健康，係瘦少少。但身體都係好易病，可能年紀大咗掛。

三角朱古力姨今年走咗了， 媽咪好傷心，而我都好傷心。還記女神講自己好少係人面前喊，因為唔想俾人見到自己最軟弱一面。我明白的，我都曾經做過，但我有抑鬱呀，或許係因為禁而引起抑鬱的。做人真係好化學，話走就走。年尾c9個媽媽都走咗。珍惜現在，活在當下。

當朋友決定做變性手術時，又再反思我會唔會考慮呢？原來我真會計數，心態不會排在最頭，後果和之後面對的一切才是我要考慮的東西。所以結論係唔會，因為得到的比失去更多，還有無數要面對的事情。Anyway，我佩服朋友的勇氣，我實在不行，加油。

當所有都講晒，唯一一樣我係上面無提到的　－　感情。還是交白卷！完！

SOII interview 2017

今年又in SOII了, 已經是第二年。第二年比第一年的感覺好, 起碼對手頭工作的事情會熟一點, 對身邊的東西認識多一點, 還有的是我完成了PMP的課程, 對自己的認識多一點。

曾經有前同事講過, 讀完PMP, 對所有的事情都有另一套的想法和看法, 還有當中學到的是之前未見過的。對, 真的對。PMP所談的內容看似一些已知道的事情, 但當所有野都程序化了, 就會有另一個想法了。雖然我未考PMP, 考唔考都仍然是未知之數, 但我仍對這個考試存一定的寄望。

再談SOII的interview, 今次準備的東西和上次差不多, 但今年我比舊年還要忙, 要擋住壓力, 要頂住所有的事情, 真的有點難度。或許這是考驗吧。但我仍會努力去頂住一切, 向目標前進。計算成數, 再選對自己最有利的東西去做。這都是PMP教了我的事情。

十一月有兩件大事, 十一月中校友會的晚宴, 還有很多事情要跟進, 但我有的時間不太多, 我仍相信一切神都有安排的, 不要太過擔心, 事情會順利的。又是要計算風險和在困難中找出路。加油啊。

十一月尾東京之行, 房和機票都訂好了, 但行程還未計劃好, 一切等待我完成SOII interview再處理吧。

今次的interview 有一定的信心, 一切都交神吧。無論成功與失敗, 我都有一定的打算, 還有一些計劃, 感謝神給我智慧。

這段時間真的很累很累, 但雖如此, 我們仍需要依靠神, 不要擔憂太多, 神會安排的, 相信神吧。

不公開的致辭稿

校監，校長，各位老師，各位校友，你好。不經不覺校友會已成立十年了。

在搜尋器上打上十年，搜尋器顯示最多的是一套電影，一套震撼住每一個香港人心的電影，電影是由五個故事組成，每一個故事都講述著香港十年後的景況。或許十年後這些電影情節是不會發生，但有些情節，不需十年，現在正日日夜夜在發生著。十年可以是好遠好遠的事，同時十年可以係好近好近的事。

雖然香港回歸二十年，但這不是一件值得慶祝的事。香港人生活水平每況愈下，強國不斷用不同的手段威迫利誘香港人屈服，每次香港人反抗就變成反共分子，不愛國家不愛國，這是什麼所為？紅衛兵嗎？回到文化大革命時代？

常說港獨，為什麼會有港獨的出現？一切是由於香港的自由不停被迫害。回想二十年前的香港，為什麼英國管治下的香港人生活安定？因為英國人深明強勢管治只有反效果，要香港人真真正正信服就是要給予自由和空間。最終換來香港人成熟了，學懂尊重。這是英國人給予香港人最寶貴的禮物。

香港的前十年已過去，被中央迫得不似我們所熟悉的香港，香港未來十年會怎樣？我不知道，只知道十年後，香港仍是叫作香港，但本土本地等字眼會變成什麼呢？還會否是我們熟悉的香港呢？

校友會未來的十年我不知道會怎樣，但願比今天更強大，凝聚校友，多謝各位。

原來....原來....

原來....我真係好耐無寫Blog...
原來....我真係好耐無上來呢度....
原來....我好忙.....
原來....我大多都係無事忙...
原來....我好耐無拍拖...
原來....我失去拍拖的感覺好耐...
原來....我失去愛的感覺好耐....
原來....我已經唔懂得愛了.....
原來....我根本唔想拍拖...
原來....我唔識去搵伴侶了...
原來.....我會執著於自己...
原來......真係好多好多原來.....

2017展望

又寫展望......除咗身邊人身體健康和快快樂樂，我都唔知可以寫咩好了......真係，身體健康最緊要。

先講健康...為咗將來，現在點都要做運動，點都要keep！自己喜歡打羽毛球，希望真係可以keep到啦，加上真係想抽出面，相信自己能力都可以，但體能和傷，真係要小心點。

講學習先再談工作，學習方面，只想今年考到個牌，有無用？唔知？多一張入場卷總比少一張好。相信自己相信的事，加油，努力。

工作方面，約如果有得續，一定會續，但之後點？無考慮太多，會唔會轉工？其實我都懶轉工！還想試多一次SOII？唔知！公務員的工作好悶，我未必喜歡，但無論怎樣都好，等候神的安排吧，無論我有多不甘心，我都只相信神的安排是我最安心的決定。但都係那句，唔好禁懶啦.....勤力點好嗎？我認，我堅懶！

家庭方面，都係想多點時間陪家人，沒有其他，沒有想太多要想的事情了。

還有旅行？九月或者會去加拿大，還未決定，還看家人的健康緊要。考完個牌的禮物想是一個日本之旅！平去可以了，自己去都可以。

愛情...這點從沒有考慮過，什麼都沒有就不要談愛情好了。要來的就由她來，不來的就不要強求吧。凡事隨心，等候神的安排吧。

寫到尾....除咗目標係要考到個牌之外，今年展望沒有其他了。做人，還是實際一點！

其實這份工帶給我的是更加認識自己，知道自己的能力是看通他人。知道別人在想什麼和估算他人，但有沒有用？for my reference only！只是用得其所，不是心術不正就可以了。我...是一個基督徒，是有仁心的。Thanks God!

2016 總結

又係時候寫總結了，回顧2016的展望，我只看到感恩和平安喜樂。或許人不應有太多要求，不介意太多就會快樂了。這點我盡力做，因為我還記著我是神的兒女。

2015年中傷心過了，2016年中又是傷心的一年，這點不太想再談，到今天還是接受不來，未ready，未太接受到事實，或許...事情來得太急太快。雖然接受不來，但是還需要接受的。

2016年頭搵到份。。。好遠好遠的工，最終只是工作了兩個多月，試用期還未過就被炒了。感覺總不會良好，但如果要我再選擇，我會否再是這樣做？我不知道，我只知道一切神都有安排的，我不會去考慮太多，我只會考慮到是神的安排吧。Anyway，這兩個多月，我學會了很多，亦見識了很多，感謝神讓我認識到不少波友。或許和我估計的接近，不過無論怎樣都好，不要考慮太多。失去，未必是壞事，真的太遠太遠了.....

年中終於又回到統計處，今次回來，感覺舒服。位置好，加上同事都幾好。見到某d舊同學，唔認得都唔奇，都禁多年了。這次是一年合約，或許會續，看形勢都會。男上司相對會好做一點，加上兩個男上司都是沒太多所謂的人，能力...不評論吧，每個人走到上高位都總有點原因的。這次統計處的經歷太多的奇蹟了。沒想過apply soii會有得interview。以一個未夠一年年資的人，有得interview都算是bonus了。雖然結果考不想，但別人總是超過兩年的經驗，以我這個BB班的人，以出面interview的技巧去interview已叫盡力了。

今年年尾終於dick起心肝去讀書，選上PMP因為以前的經驗，初定二三月左右考試，一切都是盡能力吧。雖然返了兩星期學，但仍未習慣，是太耐沒有上堂還是自己真的太懶呢？Anyway，盡能力，加油吧。

今年在開工前和媽媽去了一轉台北快遊。提起食，真的怕了。和媽媽去旅行是快樂的，雖然一早打算自己一個去旅行。從來自己去旅行是任性的，是的，從來都是任性的。

今年身體一般，健康都一般，兩次扁桃腺發炎，加上一些小病。小病是福，盡力做到健康就夠了。想去跑步，但最愛還是羽毛球和boxing。。。boxing盡量少打，太多傷了。還望羽毛球終有一天可以出外比賽，我對我的球技有點信心，由其是....控球~~我能力不錯吧。只是我比較沒有時間練習吧。

家庭方面，阿妹嫁了，不常回家，常以whatspp或facetime聯絡，一切都還可以吧。而阿嬤的身體不算太好，總是非常擔心，有時間都想多點回家陪她吃飯，已盡力抽時間回家了。

這一年總括而言除了愛情外，什麼都還可以，凡事感恩。而愛情....人愈大，心態愈變，愈得隨遇而安，沒有想去追，沒有想去求，或許未遇上，或許已經遇上，無論是誰都好，都是一個原則，靜候神的安排。有些人，無論怎樣求都沒得到，不是錯過了，而是不合適我。有些東西，我從來都介意，這點從不退讓。所以今年愛情還是交白卷，從不意外。事業都未準備好，談什麼愛情？有些人，有些事，感恩遇上了，感恩她快樂，感恩在某些特別的日子特別的慶祝了，感恩神的安排。

2016總結是感恩。

2016 年生日

隨住年紀愈來愈大，生日願望愈來愈簡單，有時真係身體健康勝過一切，錢真係買唔到健康。

今年生日沒有外遊，一直都是忙碌著。只是正日生日到海洋公園走了一轉，快轉。玩了點機動遊戲，行過展館，看了點show，一個人，快轉可以好快完，可以看到好多好多野。

其實簡簡單單的生活就是快樂了，懂得感恩，感謝神的一切，快樂就是這樣了。今年雖然已經過了我的生日，但今早一早為友人送上祝福，樂透了。

感謝大家的生日祝福，一切都在心中。或許有點缺失，但....有些東西是自己選擇要完結的，放手和放棄分別很大，總帶著一點遺憾，但這一切都要為自己著想，為自己好，應該完結的，請完結。

最後都是感謝神。

情緒病

今天有點閒，有點時間，不如寫篇野，分享一下自己對抗情緒病的經過~~

有情緒病已經十幾年了應該無廿年，十幾年前有咩事有情緒病？或許是當年的一件事。。。詳細唔想講太多，因為講了又講，而且過咗去禁多年，就算見到同一個人又如何？對事情有幫助嗎？早好幾年係撞過佢，但又如何？互不相識，不作交流，又影響唔到自己，那就不用理吧。

其實一直都有情緒問題，只係唔需要去看醫生，又或許是神的力量，每次有問題，神都會在我身邊陪我走過。宗教係最能影響我的關鍵，由開始發病到今天，都因著宗教的力量帶我走下去。我不知那天我會更嚴重，但我從來只會相信，神唔會放棄我，會陪我一路走下去，我跌低了，神會扶起我再陪我走下去。

或許神未曾應許天常藍，但恩典一定夠用。

每一次遇上都是經歷，要找到自己的路，而這路上一定有神。我信！

其實每個人生活中都遇上不同的壓力，壓力可以來自工作，可以來自家庭，要解壓就要有方法。

還有的是面對別人的排擠，感覺是不會好受的，但怎樣面對和處理都係一個抗壓的方法。你問我怎面對？我只能告訴你，此處不留人，自有留人處，留得青山在，那怕無柴燒~XD

最近有朋友的親人患上情緒病，問我怎面對，一開始食藥就太累，唔食藥就有幻聽。我只能說，藥開始了，就無得停。心病還需心藥醫，如果因為身體影響還可以食藥解決，但如果是心病的話，任你怎食藥也解決不來。解鈴還須繫鈴人，要解決問題，先要對症下藥。道聽途說，說者從來容易，但行者永遠困難。

這刻我感謝神用我偶像告訴我信仰的重要，更感謝神教懂我怎去面對困局。困局解決了，還有點餘下的問題，我都學懂怎解決了，感謝神的力量。