月老。青雲寺

 早幾個月，無啦啦跟佢車上咗去屯門青雲寺拜月老。佢仲有拜唔知咩神。。。。我記得有太歲既。我好記得月老，我好似同月老有感應。我呢種係激死月老既人。

早幾日，心血來潮想去拜。星期六又剛剛無野做，星期五晚搵咗啲資料，做咗少少準備，星期六一早就去。本來想搵朋友一齊去，但最終都係自己一個去了。

地圖寫三十分鐘。。。一路行，一路只見斜路。。。我有啲想放棄，但諗下，斜路我應該得既，加油，頂埋佢！我戴住Apple watch…見到心跳過150就要停，雖然好似好多人行，但得一個人，小心啲好。十二分鐘左右上到去。。。突然電話響。。。😑係佢！邪唔邪啲呀！我到門口就打嚟！又講差唔多既野啦。。。總之就邪門啦。。。傾咗一陣。。。我就行晒全山一個圈，拜完月老，同月老講咗幾句就閃了，來回都係一個鐘左右。下次有時間心血來潮再去過。不過。。。我呢種人真係激死月老！真係有緣既話，點都會係埋一齊既！

其實之前仲同佢拜過姻緣石，但姻緣石我就唔上去了，係慈雲山，要係黃大仙醫院上去，去親那邊我都喊既！諗起媽咪最後既日子！我唔係好想上去囉！

佢有提過下要還神，我諗佢唔會搵我陪佢架啦，佢搵人揸車上去架啦！我自己搞掂自己想去既地方就算啦。

講完啲邪野，講返工作。。。我又做錯野啦。。。今年都真係好多次。。。計埋前公司單大既。。。唉。。。搞咩。。。加油呀！俾心機！頂住呀！

不如講下青雲寺。其實唔難上去，由屯門IVE行上去，我爆得既，十五分鐘完成！寺院都幾好行，唔黑，有啲歷史野可以睇下。天氣好可以遠望屯門一帶，好靚。好風好空氣。而月老，我總覺得有緣既會有條紅繩跟住，唔知係咪真，直覺係。信就會有！

希望？巧合？命？

 最近有朋友學八字，我俾咗我八字佢睇。我個八字其實難睇既，因為子時出世，前一日同後一日都有啲特質！

朋友睇完，講中咗我多女長輩錫我，仲講中咗我媽係點既樣，同老豆關係唔太好，那年我沖媽咪，那個時間我轉工轉得多。不過佢講咗我係唔會孤獨終老，佢講咗我既另一半日柱係乜，性格係點！我聽完o晒咀！我有問佢幾時遇到，佢問我今年無識人？其實我之前八掛睇咗個人既八字，雖然得六柱，最緊要個日柱啫。。。就係因為呢個，我o晒咀！係巧合定係注定？我滿腦子問號！佢真係今年搵返我。。。今年無啦啦傾計食飯，睇返啲msg又係無啦啦特別節日send野俾我，禁多年都無既。。。之後。。。唉。。。到底係注定？巧合？定係故意？我真心唔明！不過我都只能以平常心去諗，唔好俾希望自己啦，俾禁多希希自己，失望愈大！我都唔知到底想佢中定係唔想佢中，不過。。。將來既無人知，又或者真命既不是佢呢！

命裏有時終須有，命裏無時莫強求！

涼了？心情麻麻？

 天氣突然涼咗。。。我總覺得。。。好凍。。。

其實。。。我有點心事，想要個樹洞。。。但我知。。。呢度半公開，唔可以講太多，有時怕影響到人，所以都係。。。搵雨仔傾計算了。

我用開既email一直都有放條link係度。。。只係有時我真係會抽走。。。唔想太多人發現，因為都真係想寫自己野，但又唔想太多人知。

不如講下心事。。。講啲可以講既。。。

原來我放棄愛情好耐了。。。無諗好耐。。。唔想強求，無得強求。。。一切唯有隨緣吧。。。

見到第啲人好進取，原來我已經無力出擊。心態決定一切，原來心態已經放棄了。啲人鐘意出去蒲去玩，其實我唔太喜歡。我情願去打波或者係屋企睇片。。。原來我有啲宅！

其實我好唔鐘意人哋呃我！我知有時啲人講大話，我知，但我唔想去踢爆人哋。我唔明點解啲人會呃我，其實我真係有得傾架，我個人都幾唔介意架，只係我介意人哋呃我啫。。。anyway…我諗過兩日我會唔記得了。。。應該好快無事了。。。

有點累，是天氣還是。。。不知道了，不要想太多，自己有預算，知點做掛。。。唔講太多了，有太多唔講得。

無所事事一記

 準備send 野俾人, 無啦啦見到自己blogger既link.. 原來我一直都無抽走我放email 既footnote... blogger既link...

到底有幾多人會睇? Who fucking care? 這是我一個可以放鬆, 亂9禁up既地方, 自由自在, 不受管制, 鐘意講乜就講乜。但我諗有些事情我還會保留, 免得自己中晒伏... 受既會係自己... so... 

想講乜野? 工作? 兩個月了, 還未係好適應, 機會是有的, 我還是會盡力做吧... 有時會諗, 不如返去做返campaign啦... 但係如果講機會, 呢面會好啲, 還未到最後, 唔好放棄呀~~~

 講家庭... 其實無太多野好講, 一個人住, 總想住得舒服一點。在家最愛做什麼? 扮死屍.... 睇電視... 型呢~~ 當日設計屋企固意令空間大啲, 盡量郁動既地方大啲, 所以全屋既活動空間係好高... 打功夫都得呀....

講愛情? 這從來不是放第一位。人愈大, 愈發覺唔需要愛情。有人問, 我係咪好憎自己, 總係鐘意槽質自己既? 係咪同自己過唔去呢? 可能過.... 我都唔知.... 詳細我唔想係度講太多太多... 只係想講... 早前有人問我一個問題, 我估唔到我居然唔識答... 我唔識講大話... 所以我真係唔識答。我只知... 所有野都有個限期... 當問題解決, 我知我會點做, 呢個係底線, 亦都係我可以幫到最後的野。其實一早已經決定好晒, 只係讓日子慢慢過... 人大咗, 心態變咗... 唔係只係睇想要, 係要睇需要.... 有朋友明白我既, 會知我諗緊乜野, 唔明我既, 我都唔會想講太多太多野。我知有朋友會擔心我, 但放心, 我無事既, 可能前世欠咗人啲野, 今世要還.... 不要諗太多, 我桃花弱到一個點... 唔好諗太多啦, 凡事交俾神, 咩都唔好諗!

有時飲得太多咖啡多, 會抑鬱。睇返禁多年, 都係有時會出現.... 唯一係習慣佢... 而同我面對呢個病既, 都係神... 點解會禁? 性格定遺傳? 我真係唔知, 我只係知我不可能沒有神.... 由其係... 之前面對的一切... 神和我同行... 沒有神, 我真的不知怎樣做... 不知怎樣過.....

還有什麼想談? 唔想係度寫既就唔會係度寫.... 都係想去瞓... 再談.....

壞心情 但總要過

 老細中咗招,唔俾返公司, 被迫留在家... 但係咪每日都留在家, 呢個問題我永遠都唔會答的。

昨晚發生的事情, 睇完好多片, 心情唔多好, 好夜先瞓, 好彩有打波, 身體累就可以休息....

今日心情都係唔太好, 我諗全香港的人心情都唔會好的.... 這是鏡粉的事? 應該唔係.... 可能係全香港人的事。我從來不是鏡粉, 我是向日葵。面對之前對Ash既攻擊, 都係等待和留待, 無什麼可以做, 支持偶像, 走出黑洞是唯一我們可以做的。A姐, 加油呀..... 

早兩晚見到A姐的演出, 不禁叫咗一句... 放開個女仔呀....頂!

講完呢啲, 不如講下新工...

不習慣.... 三隻字, 講完? 未.... 講下咩唔習慣先啦... 一係文化, 二係語言。文化, 全部都用中文.... 所有文件都係中文... 連d term 都係中文.. 真係暈... 再接落嚟講語言..... 隻隻中文字我都識... 夾埋一齊就唔知點解... 完! 可能我中文差掛... 我連ppt啲字都唔識讀呀.. .頂..... 真係勁呀.... 講國語... 我真係暈呀... 與其XX 不如XX.... 盡力...盡做啦....

 不如講下校友會... 上星期校友會會員大會剛剛過咗.... 最後一次代表執委會致歡迎辭... 頂... 個腦一片空白... 痴咗... 係準備不足定係其實我一直都情緒不好呢?

份工作報告終於唔駛我做了... 話囉... 但其實都係要我出手... 件文書寫到不知所謂... 我真係過唔到自己, 出唔到街... 唔好禁好唔好... 份財政報告都係我寫, 其他野都順順利利, 無太多的特別。還有是上兩次的會議紀錄... 打咗少少.. 我真係無咩心情執靚仔佢... 所以寫重點就算, 文筆唔好都由佢.... 唔想用文筆好的腦去寫...所以... 廣東話式中文, 風格吧....

心情唔好, 是但鐘意寫乜就寫乜, 隨性一點就可以了... 唔好太在意, 人馬太愛自由了, 其實人馬已經有好多自由, 但總係覺得唔夠... 這是人馬! 不節不扣的人馬! 哈哈~~

God bless all. Just hope every one can recover soon. Wish health and luck.

簡單記

估不到再來這寫心情已是三年的事了。一九年.... 難忘的一年, 這改變了整個香港, 變得陌生。香港變了, 香港人變了, 地域變了, 一切都變了。

進到二零年, 這是我難忘的一年.... 年頭阿嬤走了, 一百歲人, 還想怎樣? 活到二百歲? 她也很辛苦吧, 雖然見到我這個孫很快樂。平凡是福, 她有的福氣, 各兒孫很孝順。 年中, 媽媽也走了, 沒想到她那麼早走。還有很多很多的地方想帶她去見識, 可惜.... 時不願矣。病痛很痛苦, 苦了她, 身邊人見到她受苦也很痛。這一年, 是用淚水建造的一年。年尾... 終於搬出來自立了.... 同爸爸的關係也因為分開住變得有點緩和。還記得阿嬤走時, 我仲係政府做, 雖然同事有安慰我, 但行政上的人情味實在太少了。到媽媽走時, 她離留兩天, 這兩天... 除了陪伴媽媽外, 工作我真的不知如何處理了。幸好有好的管理層讓我安心陪伴媽媽走完她人生的最後兩天。媽媽走後, 我還要工作, 忙碌的工作令我忘掉一點的傷痛。感激我的同事和管理層人性的處理。這一點的心意, 我永世難忘。

 到二一年, 這是忙碌的一年, 除了工作, 我真的記不起我做過什麼了。媽媽上位, 阿嬤上位, 還有點家庭聚會等都希望為阿嬤和媽媽留點位置。

來到二二年, 這半年都是忙碌工作, 大事沒太多吧, 或許工作真的太忙太忙了, 還記得有兩星期連續一星期都要工作到半夜一時, 沒有出外, 也沒有時間煮太多。身累, 心更累。這份工作做了兩年, 認識了很多新的事和人, 還有很多學習的機會, 希望將來受用吧。寫到這, 回想這兩年的工作, 真的只有工作, 沒有其他事情了, 這健康嗎? 還好我還有羽毛球, 只是少了點校友會, 少了點其他的事, 或許我是時候應該放自己一個假期, 休息一下, 希望下一份工更好吧。

2019 展望

又要寫展望的時候了，從來都覺得展望是最難寫的，因為愈是期待愈美麗，期待從來都不似預期，所以我總習慣會有plan B。

2018過得不錯，有得有失，但總括而言是不錯吧。要改進的地方多的是，由其是脾氣，真係要忍下，要控制下。

另外就係要忍下口，唔好講禁多無謂的野，講多錯多，真係要忍下口。唔關自己的事情，唔好禁八卦，要忍住，要忍耐。

睇咗呢半年的運程，看似不錯，又係那d要諗正面d，唔好太負面，要換個角度諗野等等等等，Anyway，運程呢d參考下啦，最重要都係自己點做。

運動都係要keep，想做多d運動，但無奈好似無咩時間，因為太忙，工作忙，忙住返屋企陪屋企人和忙住搞自己檔野。羽毛球方面都希望隻手快d好返，打好d，用多d腦打波，希望有多d進步。Boxing成日都想打返，但我知打返風險好大，有機會再傷，要就住和忍手。

同事和朋友方面都係那樣，忍耐一下，有時忍口，幫到就幫，盡量做到多一個朋友，少一個敵人。有時間，多d約下朋友吧。

工作方面，好多野控制唔到，只知五月尾完約， 完約唔會續，要為自己打算一下。暫時係想去個旅行，長短線都好啦。阿媽未必得閒同我一齊去，因為阿妹五月左右生，禁啫係得我自己去啦，要計劃一下去邊好了。暫時一月都仲未收到信幾時SOII interview，平常心啦，唔知結果，只知盡力去做吧。

年尾試咗好多用SAS寫Code，再搵工會以SAS和budgeting或者數為主的工作。年尾有個ACO的skill test，諗咗好耐請唔請假去考，最終都係決定唔去了，因為工作太悶了，無得寫program，又無得主要對數，我又唔係好想做。做開programming和數會開心d，所以主要想選返呢方面的工作。

愛情方面.....真係無咩推動力，我連主動的動力都無。會識到新朋友，但同性的唔會主動去識。我知我要推自己去識，但真係無咩呢個動力。或許單身太耐真係會習慣的。

家庭從來都重要，永遠都放在第一位。所以2019年都會以家庭為主導，什麼都會以家庭行先的。

理財方面沒有太多的考慮，都係做好儲錢的管理和投資低風險的東西吧。做人唔好太貪心。

凡事都交俾神安排吧，我知，神會為我安排最適合我的事，我所經歷的，是神陪我一同去經歷的。

2018總結

又到了寫2018總結的日子了，又係時候細想一下今年有什麼總結。落筆前再看看自己寫的2018展望，到底做到多少呢？

今年除了必要和打波的時間，真的盡量抽時間返屋企食飯，有時一星期唔止一兩日，有時三四五日，盡量抽啦。但真的，返屋企食飯真係幾悶，因為食飽無咩野做，自己檔野要做的真係唔算特別多。或許要計劃一下夜晚食飽飯有什麼可以做，最少真係去練下步法練下手法都好啦.....好過坐係屋企唔知有咩搞好。

工作的事沒太多的特別，機會是多的，都是學習和試練的機會吧。年中換了老細，咪哥升咗去第度，心姐又考到SOII，年中真係好忙，要食晒心姐的大部份野之餘，又轉老細要再習慣過。雖然辛苦，但都總算頂得過去，順利交接。而我都功成身退了。。。或許。為什麼是或許？因為新的同事....有點＂可愛＂，是傻得有點＂可愛＂。或許太新，或許處世不多，或許唔夠聰明吧。Anyway，盡力做。我大老細成日話好满意我的工作，可能係面試的原因吧。Anyway，面試真係要講運，希望今年好運吧。舊年運氣仍不夠。

我份約二零一九年五月尾就完結了，之後怎樣我也不知道，我只知....我會去個旅行吧。其他就由神為我安排啦。我強求都沒有用。

或許之後會考慮返SAS或者主力對數字的工作。今年用SAS的機會下半年比較多，自己寫，自己改，重拾當年的感覺，這感覺真好。

身體方面長期受傷患困擾，沒完沒了。仲做緊物理治療，少痛還有，只希望快點完結吧。因為傷患的關係，完全影響運動，有時想發力都唔可以，打波要就住，唉。這是經歷，要有智慧點面對。

財政方面算穏定，無買太多的野，只係換咗部電話，買咗部電話俾老豆，其他都唔算駛好多錢，算可以吧。不過年尾爸爸可能又要再通波仔，現在都係等睇報告，交俾神吧。至於間鋪呢....清咗一部份舊貨，暫時仲有些舊貨係度，目標都係想清舊貨，新貨都要睇賣唔賣得再入。但主力都係想做返運動野，或者運動有關的野，希望2019會好少少吧。仍然未換相機，都係那個concept，換咗d必須品先，其他非必須的就等下先，再諗下先。

愛情仍然空白。期待愛情，但看似完全無動力，或許仍需主動，或許已習慣單身吧。想放棄，但友人仍然不想我放棄。感謝各方好友的支持。

校友會換咗屆，好多事情都沒有改變，有些位置換咗人而已。但上半年同學校的衝突比較多，不满一號的指數不停上升，到九月最終都搵校監傾過個問題。但問題看似解決了，但其實一點都沒有！之後點行，之後再算吧。只係我從來都唔喜歡玩辦公室政治，非常討厭!

年尾發生的事特別記得，有件事我總是想不透。或許我從來都無太多的事情需要唔俾人知。無許點唔俾人知，只要發生過，總會有人知的。好多好多的事情，我都唔需要講出來，只係身邊的朋友唔問就算了。所以朋友唔想佢的現況俾人知，呢下我真係看不透！Anyway，從另一個角度睇係好事，因為兩個女人唔駛再夾住我係中間問來問去追來追去，勁煩!

寫到尾總結2018有開心，有唔開心的事，最重要係調整自己的心態，凡事盡力不後悔。幫到人就幫，唔好太計較得失，平凡是福。

2018 展望

寫完總結，總需要去寫展望。人愈大，展望愈簡單，不再追求什麼名利，只想一家人平平安安，身體健康就夠了。

屋企三寶已步入老年了，身體大不如前，可以做的盡量做，控制飲食，盡量抽時間陪和處理家中各事都夠我忙了。家庭永遠都放在第一位。2018無論工作有幾忙，有幾多野做到好，一星期總希望可以抽到一兩日回家中食飯吧。

工作的事情，從來都不是我可以控制的。SOII還未有結果，盡咗自己努力了。平時係公司都係做到的一定做，做唔到的我都無辦法。但願工作一切順利。我亦需要為自己的前程打算一下了，如果考唔到SOII，是留下，還是出去做返budget management 的工作？我喜歡管數，喜歡控制成本，喜歡拆彈，所以係呢方面發展一定可以的。

身體方面，只希望自己無太多傷。小病是福。年尾右手手掙痛....估計係打overhead時手落返來那一下動作做得太差所致的。而身體其他部份問題都唔大，只係一直都係.....病下停下再病下.....保重吧。

財政方面真的太懶了，說好的管理好自己財政的事，完全無時間搞。阿妹仲提議我去起返個投資戶口，我都未有時間，手頭上的股票，可以放的，盡量放，新股就最好抽完放晒佢了。2017投資方面唔太順利，希望2018可以好一點。但我都係保守型，盡量唔投資高風險產品。

理財方面已經買少咗好多野，想換相機講咗好多年都未有行動。睇中部二手，但係都未有行動。生意方面因為carousell 的興起，賣咗好多唔等駛又舊的東西，都算係一個好的開始。希望盡快清晒d舊貨。2018加郵費，變相profit少咗，禁就不如減價cut包郵，禁做應該仲有數圍。

運動方面，羽毛球技術係2017年總有點進步，希望2018年更加進步，由其步法，加油!

寫到尾，又係寫愛情的時候，沒有期待，沒有期望，可能成果更好呢～靜待神的安排吧。

總結2018展望，一切靜候神的安排吧。只有更愛神，把一切都交俾神吧。Thanks God.

2017總結

每年過咗生日就開始著手動筆寫每年的總結，每年寫總結前都會回顧一下一年前自己寫的展望。

2017年，平淡的一年，有喜有悲，要我用些形容詞來形容，應該是學習年。

今年最終都無考到PMP，出年PMP又轉課程，到最尾考唔考都真係未知之數。但PMP教懂我的野，今年大多都可以用出來，無論在工作上或個人的事上。沒有考試是有點可惜，但學到的比得到的多就應當感恩了。

工作上變化不大，唔駛轉工我已經感恩了。工作上的機會有很多，或許未必每次都能把握機會，但盡咗力就夠了。與同事間的關係好咗，可能大家接觸多了，還要記著一件事　－　謙遜。雖然自己真係好叻，但這世上還有人比你更叻！經驗的野，你有條鐵咩....學野啦，細路！係政府做野，唯一一樣野好係無太多的壓力，慢慢做，把生活的節奏放慢一點，唔駛跑數，又唔駛趕得好緊要，一切都慢起來，對我身體來講係一件好事，所以目標都係政府工作。私人工仲諗唔諗？時時刻刻都想，那份挑戰拆彈係政府工好難俾到你的。但人大了，需要穏定的，每日都有挑戰，心臟未必負擔得起，還是安安份份做份穏定的工作吧。

今年亦有機會interview SOII，結果不知道，希望是好結果吧。今年interview時問中我的工作，Online Questionnaire 對field的同事是好是壞。我把我的經驗都放進入去，希望今次可以成功啦。

運動方面，今年的羽毛球技術明顯進步咗，步法都好咗，但狀態真係一時時，自從十一月中病到十二月頭病完都仲未夠氣打，都仲有少少咳，希望再休息一下會好返晒，足以前禁跑得啦。但傷患永遠都係運動員的天敵....網球手就係年尾發現了，希望快d好返啦....

今年十一月校友會搞咗個晚宴，呢個晚宴我花盡心血都搞，可惜個個幹事都話唔得閒，一係就幫唔到好多手，大部份野都係我一個人做，真係做得好辛苦。晚宴係成功的，當晚的回響都不錯，只係我身體已經頂唔住了。都三張半啦，再不是十八廿二，係時候考慮退落來的事情了。出年仲會唔會係主席？真係要好好考慮，感謝各位老友的支持，今次真係look盡人情咭，感謝各位，感謝神的保守。

今年好開心可以同媽和妹去東京旅行，東京好唔好玩？ok啦。旅行開唔開心？當然開心，但真係好鬼好鬼疲累.....堅累.....係我的問題定係身邊人的問題？一定係我問題啦。。。哈哈...期待下次再去玩呀~~~唔好要我禁辛苦就得了，今次係所有野迫晒係同一時間發生，真係人都癲呀。

Shop的生意一般啦，有時突然爆好生意。有時可以清到舊貨都好開心，Anyway，現在定位係享受做生意呢份樂趣，唔好俾太多壓力自己。 我做生意有我的原則，只要記住那原則行就可以了。

爸爸的身體大不如前了，有時心臟會痛，會唔舒服，但暫時來講唔需要做手術住，十一月頭照完CT，暫時無塞，但都需要小心留意一下。而阿嬤身體就一般啦，年頭成日入院真係驚，年中都可以啦，間唔中出出入入醫院真係驚的。我可以做的都已經做晒了，屋企set晒cam，希望佢係屋企都安全啦。而媽咪就肯戒口，血糖和血壓都可以，又每日行運動場，鬼禁健康，係瘦少少。但身體都係好易病，可能年紀大咗掛。

三角朱古力姨今年走咗了， 媽咪好傷心，而我都好傷心。還記女神講自己好少係人面前喊，因為唔想俾人見到自己最軟弱一面。我明白的，我都曾經做過，但我有抑鬱呀，或許係因為禁而引起抑鬱的。做人真係好化學，話走就走。年尾c9個媽媽都走咗。珍惜現在，活在當下。

當朋友決定做變性手術時，又再反思我會唔會考慮呢？原來我真會計數，心態不會排在最頭，後果和之後面對的一切才是我要考慮的東西。所以結論係唔會，因為得到的比失去更多，還有無數要面對的事情。Anyway，我佩服朋友的勇氣，我實在不行，加油。

當所有都講晒，唯一一樣我係上面無提到的　－　感情。還是交白卷！完！