最佳位置？

 今晚未瞓，不如寫下今日發生的事。

今日又幫佢做阿四。。。唉，算啦，反正係我自己都無咩所謂。。。之後約咗佢陪佢去師姐度按摩。陪佢坐巴士去，係巴士上，佢又同坪洲講電話。事緣係坪洲問佢放工未，係咪入緊師姐度等等，小姐唔高興，打電話去屌佢，條友講野都幾串，我坐係度唔出聲笑。但我feel到佢真係唔絕情的。

我感覺到坪洲想管佢，想試探佢係咪自己一個人。我感受到佢想攻占佢的心或者生活。但佢又唔想俾人管，唔想俾人攻占佢的生活，佢聲稱佢覺得見到都討厭。我全程無出聲，我看在眼內，我都唔鐘意去知禁多野既，我只係做佢既listener。我估佢對對方曾經諗過，但似乎真係唔得。佢終於講我知坪洲真係以炒為生，所以做freelance和炒使生活費。以炒都夠交租等等。但佢係傳統的女人，唔會覺得呢啲係安穩係呢種。佢係我媽既諗法，所以佢有啲野真係吸引我的。佢的諗法同我媽好似，由其是諗將來安穩的野。我做到我媽要求的一半，有層樓，係阿媽幫我的，我有阿媽教我的能力去儲錢做儲備，計算自己幾耐無野做，供到樓，生活到之類。識點用最底風險投資等等。都係阿媽教的。或者我呢樣野比坪洲好吧。

佢講到自己好嬲坪洲話我係二打六，話佢俾個二打六做都唔俾佢做。哈哈。我知佢搵坪洲做架，不過佢俾邊個做咪邊個囉，我又唔會呷醋既，有呷既，不過我唔會表現出嚟，呢個係我既特點。暴小姐知呢樣野，不過都係好耐之後佢啲朋友講佢先知。我唔鐘意我唔會出聲既，但係心入面囉。

我知我有時都會呷佢醋，但我又唔想做到太出面。講到尾，我同佢乜關係都無，又唔係佢邊個，我無得呷醋啦。

佢又叫我去補鐘練返手車啦，幫佢揸車喎。我諗我都係時候諗諗去練架啦。。。應該啦。。。唔係揸佢架車，係去自架遊日本呀。仲有加拿大等等。

佢有講過，如果我又無另一半，佢又無另一半，將來會互相扶持喎。我想講。。。我唔想囉，我都係為自己好啫。佢得一想二，我只想佢幸福。

七月返新工？

 其實之前我都feel到我七月會返新工，但唔知新工係乜。估唔到南洋一見就請，啱唔啱？我只係覺得有啲伏，又係中資。。。唉，其實我堅唔鐘意做中資，不過佢開36俾我，我都係做住先，因為無其他請。AXA仲有兩round interview，對方都ok鐘意我既，只係拖得有啲時間啫。我自己幾喜歡佢的工作mode，自由啲，又係外資，係遠少少，但係佢真心feel。feel到我願意幾時開工都得。只要你唔管我，我點都得既。

我個人都幾愛自由，真係好愛自由，唔想俾人管，但內心又想有人管。不過咩都限制我，我會唔鐘意。其實好矛盾，我都知。

今日去完迪士尼，有點累，所以唔寫太多太長了，只記一些重點。

今日佢同我講，佢爆咗坪洲一野，一來因為煩，二來係因為坪洲呷醋，話我係二打六，搞到佢著咗。。。。我唔太介意別人話我既，把口係人哋度，人哋鐘意講咩就講咩，我自己知自己係唔係就夠啦。個個都要介意，我真係好唔得閒架。不過我真心感謝佢為我出頭既。但佢今晚又講一句，話我哋無拖拍，要雙依為命，佢要搵我揸佢架車車佢喎。我都講，邊個架車我都夠膽揸，係佢架我真係唔夠膽揸。因為知佢性格，所以更加唔敢。

唉。。。對住佢我真心有啲煩，但順期自然先。眼前見到自己個限期都快到架啦，要加油啊。

我希望AXA真係快啲請我啦，佢開到offer唔太差我都應該會ok既。我真心想要WFH呀。

新。幪面超人

又有新幪面超人作品上了，本身無諗過去睇，早排有朋友問開，又睇到啲介紹，又加上有少少時間，所以就去睇了。睇完我又想寫下感受。

我都好耐無睇幪面超人的電影了，之前睇好似係上年朋友有兩張免費飛，所以去睇咗新的幪面超人，新到我完全唔記得名，只覺得唔好睇，好似做俾小朋友睇禁。其實近代的幪面超人都係為咗玩具而寫的，無限禁多的變身器，完全數唔到禁多個幪面超人，啲劇情煩到一個點。。。。睇到近呢三年，我終於都無再追了，完全係鬧劇一樣。

不如講返呢套新。幪面超人。一號的故事，我無咩點睇過，我都係由Black年代開始睇。但早代幪面超人都係以英雄片為主，一個主角，打怪人，要保護地球，要打倒邪惡組織。主角幪面超人係改做人，跟住逃走出去，大部份故事都係禁結構。而絕招更加單一，Rider Kick，完了。呢啲禁簡單的故事，近代無晒了。。。我實在睇到頭痛，完全唔想再追落去睇了。

今集的電影都比較簡單，有幾個代表的怪人，打敗咗嗰幾個怪人就完了。總數有五個怪人，有交代二號的出現，有交代點解會出現。打鬥的過程好睇，簡單直接，仲要有幾下噴血真係o晒咀。整體來講，佢跟返原先既版本，有好多新的鏡頭，新的設定，作為Rider 迷，真係好喜歡，值得入去睇的。

講返點解鐘意拉打，我諗今套電影，完完全全可以話到俾我知道點解。本鄉猛係一個好善良的人，有正義感，呢一切就係幪面超人的基本。善良係一個選擇，你可以選擇唔善良，可以用計去設計人地，但如果你選擇善良，請保留住呢份善良和正義感。我有呢份善良和正義感，都係因為幪面超人。一號的善良和二號的高傲好唔同，但二號被一號的善良和正義感感動。

成套電影，我喜歡一號，我也喜歡女主角，雖然沒有感情戲，但係他們的感情，好好睇，平淡也感到他們的愛。感動。

我期待有下集，但相信難啲，因為票房麻麻。

人馬座

 有星座分析講過，人馬座喜歡自虐，喜歡將自己放到最後，總係會讓人地。

有朋友問我，我係咪真係好憎自己呢？硬係要虐待自己。一時時啦。。。我知既，我總係會將自己放到最後，愛的人開心快樂就夠了，自己好似無諗過自己禁。睇咩人啦。。。

不如講返點解禁講啦，其實都係因為我一直都係為佢諗，為佢著想，想佢開心，想佢幸福，但無諗過自己的需要。自己想同佢一齊，想照顧佢，想愛佢，想錫佢，但現實係。。。我唔想勉強人地，我情願受苦的係我。呢個係我的性格，都係我的優點。有時我會預時間俾佢，但最終呢？佢根本諗都無諗過我，禁我做咩仲要預時間俾佢？唉。。。唔知，我都諗唔掂，都係等神的安排啦，我完全諗唔掂。我只係知我既決定，我想放手，我唔想迫佢，唔想勉強佢，但我都要個出口的。

講完佢，不如講下呢兩日見到的野。我見到我啲朋友好似想試下我同另一個朋友有無可能。我曾經諗過既，但我睇完八字後，我feel到應該唔係，但如果啱，都可能試下既。但心入面有個人，點樣可以有第個呢？唉。。。

昨日見咗中信，估計有七八成，但其實我唔鐘意，因為中資，加上好多大陸的文化，我實在頂唔緊。。。唉，不過請就做住先再搵，真心啲大陸文化真係好難頂。我又開始睇下啲pmp野，原來我呢幾年都係做pm既野多，我都應該要諗下係咪係呢方面發展呢？寫code寫唔到一世，係時候諗諗之後應該點了。

選擇從來不易，但記住不後悔

 今晚又想寫下日記，雖然我都係需要諗諗準備一下明天interview既野了。

昨晚瞓唔著，又有啲野諗。成日都話病完，自己個腦會更加清晰，更加知自己想要咩。早幾日慢慢摸到自己係工作上想要乜野。係coding既領域，都係要時間再去慢慢學，近期都學python，學咗一啲，應該啱用的。解決咗一啲問題，總算有啲成果，之後落嚟就係要慢慢學得深入啲既野了，加油！本身技巧應該問題都不大，但小問題都係要解決的。

又講下愛情。六年前點解我會離開，我其實都講過幾次，我知佢太依賴我，有我佢好難搵到一個佢想要的人，所以我離開，佢唔再依賴我，佢可以搵到一個佢想要的人。而且由此至終，我既外在條件都唔係佢想要的，我又唔夠高，又唔夠白，又係b，又唔夠靚，牙又唔齊，根本樣樣都唔係佢想要的，所以我知佢從來都介意，介意我俾佢啲朋友見到，介意帶我出去，介意同我影相，我知的。我唔係蠢，我心水清的，好多野我唔講唔代表我唔知，只係我唔想講啫。所以當年我的離開，做就今日的佢。當年有無後悔離開？無！只係估唔到佢個ex對佢唔好啫。。。仲以為佢兩個會結婚。當然聽到佢結婚我會心痛，但呢個係我的選擇，我都要接受我的選擇。最近我又開始諗呢個問題，由九月到現在，都九個月啦，又係時候諗清楚自己想點啦。繼續做兵，做工具？定係再次離開佢？

我知我鐘意佢，我愛佢的，佢係咪一個我想要的人？我想要的人係怎樣？其實我想要一個善良的人，我唔需要佢好靚，但我需要對佢有感覺。佢簡單就最好啦。我想我既另一半係俾到安全感我的，佢要令我放心的，我錫佢，佢都錫我，佢需要我。我知我想要咩，佢想要咩我都知，但外在做唔到，內在我真心唔知。但最少一樣野我知既，我選擇善良，我可以好多古或野，只係我唔做啫。其實我係打波時知自己既本性，我可以設晒局俾人，但平時我會選擇唔去做啫。

one more things....我記得好多好多年前同佢同成班人食飯，當年有個女仔我睇上眼既，但返嚟佢就講到人地一文不值。。。早排我同另一啲朋友食飯，佢又講到人地呢。。。頂，雖然我都知個個都係唔得架啦，但都唔駛第一句就講人地點唔得既。之前同佢出去同成班人玩食飯，又有野講人地，唉。。。點解次次都係我同人地出去食飯就講人地點點點。。。到底佢咩心態？呢下我真心唔明白。佢啲朋友我從來都無評過，仲想推佢走tim...唉。。。佢係咪對我有野，佢自己唔知呀？根本呷醋。。。我認我係呷醋架。以我實力，殺波殺到位既，唔係100%都有七八成，離唔得遠架啦。。。所以嗰日我係有追住殺既。。。係有心既。。。而且我啲殺波唔係平飛既，我真係有角度，有力量既，力量真係睇咩拍啦。。。。

anyway，我決定咗，我返新工或者八月尾或者佢同佢ex單野搞掂晒，我就會同佢講清楚。我知道個結果係完結。我唔敢抱希望佢會想我留低，我唔敢諗佢會留我，因為我知佢從來只當我朋友。但朋友。。。真係過晒火啦，朋友唔係工具，唔會點個朋友做晒禁多禁多野，朋友唔會係幫你做完野，仲俾你丙。。。話你做得唔好，又話俾你激死佢。。。朋友唔係禁架。。。

好明顯係我頂唔順啦...內心頂唔順。。。成日諗住留時間俾佢，最終再諗多下，我無理由要留俾妳，妳係邊位？加上佢最近啲。。你知我要咩架啦，你知我鐘意咩架啦。。。-.-"""我同妳無咩關係架ja...點解我會知架？朋友ja...又係妳講架....成日要我做咩做咩就扮晒野....

問心，佢唔係真係禁靚，只係唔差。我知佢同啲男人，成日想要著數，我見到既，唔出聲，所以由佢，我知佢無野既。

選擇從來都唔容易，我明的，我會記住自己唔可以後悔。或許佢會係我命中注定的一個，但我明白如果呢刻我放棄，我會孤獨終老。我明既，我知既，我了解的。我有心理準備了。或許我無禁長命呢.....我知道我失去佢係咩感覺，我多謝佢呢九個月俾我的快樂和感動，但總要move on既，時間唔等人，我知道有啲問題係需要解決的。加油呀！

其實自己一個人，又有咩可怕呢。。。

寫日記

不如今日寫下日記。。。

失業咗個幾月，時間好似過得好快，一直都係有得見，但一路都見唔成，無咩idea有咩原因，可能價錢問題掛，唔知，我都半佛系。。。。

足足病咗兩星期。。。上星期病得無禁嚴重，今個星期真係病得好重，不停有啲燒，食咗退燒藥就好啲，不停出汗。。。個鼻不停流鼻水。。。想死。。。好彩無咩咳，希望快啲好返啦，應該差唔多了。望就禁望啦。。。。

病的日子，我唔太敢出街，唔想傳染俾人，由其是朋友，有啲不停飛的人，最唔想傳染俾佢，希望佢健健康康，佢去到禁遠，無人照顧佢，好慘的。

病咗幾日，我感到自己有啲腦霧，唔記得啲字點寫，無咩精神，要用腦的野好似力不從心，打波又唔夠氣，真係要保重。

病後開始有啲精神，開始有啲問題要思考了。工作和感情。。。感情我真係控制唔到，但都想訴兩句啦。。。講下工作先，我想搵份點既工？除咗人工之外，我想要咩？我其實想學python，呢期我自己都學緊，無咩精神，盡力吧，好彩有啲好朋友俾咗啲notes我，可以自己再望下研究下。

愛情。。。又講返同一個問題，我想要咩？我期望想要得到啲咩？我需要咩？我問咗自己好耐，我都得唔到呢啲問題的答案，可能因為我已經去到無欲無求了。我想有人關心我，我想有人了解我，我想有人愛我，或許我係佢心中唔會係最重要的位置，但我想係佢心中有個重要的位置。

嗰日病到傻下傻下，等佢做完野俾野我，等咗兩日，最終我都係頂唔順係啲公海訴咗兩句，谷友話我係工具人。。。其實係，佢有需要人幫，就搵我，連自己的工作都要我幫佢做，點解要係我。。。唉。。。真係頂佢唔順，到底佢想點？朋友係咪要做到禁？明明啲野係佢既，佢應該緊張的，但點解最終緊張的係我？其實我都病到九彩，叫佢自己望清楚份野，又唔睇，求其望完就算，有時就打個電話嚟丙我。。。呢啲算係乜？我真心唔明。。。。唉。。。鬼叫自己鐘意佢。。。但鐘意佢啫，係咪下下都需要禁就晒佢呢？佢無咗我，都可以生活，都一樣係禁生活，可能無咗我，佢會快啲搵到下一個呢。

其實禁多年，佢從來都介意我同佢一齊行，介意我，唔會想佢啲朋友見到我。其實心水清的我，無咩可能會唔知。禁多年，我觀察到的，我唔講唔代表我唔知，只係我唔想講出嚟啫。我個人比較大量，唔會亂禁講出嚟。我真係好累，心很累。。。真的，六年前，因為太累，我放手了。到今日，又行返一樣的位置，來來回回，我想對佢好，但得返嚟既呢？都係一樣。真心想坐低傾下既，但我知唔係時候，仲要等多陣？我知有人對佢好的，我成日都推佢走，佢係都唔走，唉。。。人地幾好吖，租埋間屋，租埋間房俾佢放野。。。我見到既係risk...我真係唔敢講，講得太多佢唔鐘意，唉。。。我諗佢真係要跌過痛過先識死既。。。由佢啦，反正死的不是我。。。

唔講愛情了，唔講工作了。。。最近我終於出手去搵阿嫲既遺產了，我知難，但我都想搞，我知件事都幾麻煩。。。。盡力啦。。。。

其實有無人知我呢個私人位置？可能未必有人知，又可能有人知，anyway，我只係想搵個出口，講我想講的野，我唔出名，大家估下乜水打乜水啦～XDD

講多樣。。。呢幾晚睇套綜藝節目，講初戀。。。有好多回憶，當中有個問題係如果再相遇，你會點？我。。。我會扮無野，但其實心中一定仲會有條刺！再講如果佢約你食飯，你去唔去？我一定唔會去。。。中過一次，我唔會再中第二次架啦！！！我有少少後悔點解要理佢，係整定？定係根本係我心軟。。。唉，唔知。。。係佢啫，如果係暴，我一定唔會出啦，禁嚇人，我真心仲驚佢，真係怕咗佢。。。。

善良係選擇

其實我幾喜歡聽一啲心理學的課題。剛剛聽到一個topic，善良係選擇。回想返自己的性格，我本性善良的，只係有點小聰明，如果本身選擇不是善良的話，可能已經壞到不得了。

有時我都真係唔明，點解有啲人搵好多錢，但其實真係一個仆街嚟既呢？好多人都身居要職，但做埋啲野真係好難睇。。。我唔明。。。好多野唔明，或者我從來都唔想係禁，所以唔明，更加唔想係禁，所以我選擇簡單，我選擇善良。

其實人有好多選擇，有啲人會選擇平凡地過日子，有啲人會選擇去爭取高位。而我只想快樂。。。

大頭陸衣鬥疆屍

 cctvb最近播返呢套三十年前阿mi的舊作，而我呢。。。其實晚晚都有追。好睇，故事寫得好多，阿mi做得好好，雖然三十年前的作品，但故仔真係寫得好好，好正。

講個故仔先，有少少老土既，講個男仔愛上一個女鬼，個女鬼又好為個男仔著想，到個女鬼投咗胎，個男仔根本等唔到佢，因為變咗男仔。原來女鬼個妹一直都鐘意個男仔，但佢明知個男仔唔愛佢，佢唯有放棄，祝福個男仔。為咗呢個男仔，佢做乜都願意，最後為呢個男仔死。呢個女仔遇到另一個好鐘意佢既另一個男仔，但呢個女仔唔鐘意呢個男仔，而呢個男仔又為咗呢個女仔做咗好多野，男仔雖然無咩可以做，唯有係女仔身邊守候呢個女仔，去幫呢個女仔，去陪呢個女仔。結局係點？咪個男仔幾十歲後同個女仔一齊囉。

其實飄紅和福中玉都係同一類人，鐘意人地，會講既，但唔想勉強。對方有需要，會幫手既。都知對方唔鐘意自己，勉強無幸福，所以會無奈放棄。但付出的，根本無人知，對方都唔會知。

呢啲係咪好面善呢？其實係，好多人都會禁。最終係咪好似飄紅禁，有好結果？故事個結尾永遠都係美好的，但現實應該唔會係禁架啦。。。

慢慢享受呢套劇啦，得廿集，個個都做得好好，我睇得好開心呀~~~

tru Nigen

 之前聽朋友講，買tru Nigen試，話可以逆齡、抗衰老、修復細胞DNA 、改善睡眠令您更精神有活力、激活腦細胞及記憶力!

結論係點？唔啱我食囉。。。。我食完心跳，我好肯定佢個咖啡因都好勁。。。加上我食完完全無佢講既野，反而有點抑鬱，呢個係咖啡因的後遺症，所以。。。要停，點都要停。好啦停咗一段時間，剛剛阿妹講起，我話不如俾佢試下，我真係唔得，佢話好呀。我搵咗出嚟，昨日食咗一粒，跟住又嚟了，又抑鬱，唉。。。我盡力頂住，但有時真係難啲。。。抑鬱堅煩。。。暫時只能等時間過去。。。。

其實我一向都有食supplement 既習慣，食唔少的野，都只係希望身體健康啫，無其他了。不過我多數都係選擇美加藥廠出的product，有信心啲ma....

呢期未搵到工，主要都係個fd度打波，幫佢開場睇場。。。佢唔夠人，就盡力幫佢頂，其實係我太悶，又或者係我唔開心掛。。。

昨日瘋狂俾佢鬧，話我幫佢做野甩漏。講真。。。點解我要幫佢做？我成日都諗呢個問題，十年都無變，點解要係我？明明好多都係自己的責任，但就推俾人哋幫你去做，跟住人哋叫你去睇，又唔去睇就送咗出去，真係天才。。。。

阿媽細細個就教我地唔好假手於人，自己責任要自己做返，人地幫你做，你都要睇下先交出去。所以我同阿妹都好少搵人幫手做晒啲野，點都會自己做返，就算搞唔掂，都係兩姐妹諗咗佢，自己研究自己整咗佢。。。所以我地真心唔明。。。唉。。。其實我哋係咪真係唔夾呢？好似真係唔夾。。。唔夾。。。

最近發現我的經歷同個朋友的經歷好似，由其係阿媽和阿嫲的離去的時間差唔多。。。個朋友都幾好傾，但我諗人哋唔係掛。。。應該唔係。佢本身唔靚，係朋友的好朋友，應該無野既。。。無野既。。。。

話說今晚打波，我俾個波友打中，個咀流晒血，爆晒。。。我仲喊得好勁，嚇親人。。。我知，除咗因為痛之外，仲因為抑鬱。。。之後食野如果唔啱位，真係堅痛。。。我諗呢兩日食野都真係要小心啲架啦。。。無計啦。。。。受傷總要休息下。今晚狀態麻麻，因為昨晚打咗三個半鐘呀，七點打到十一點。。。要幫人頂9-11，自己又打7-9，又要開場，又要收錢，我從來唔假手於人的。。。所以累死了...

加油呀，明天會更好的，要有正向，要正面，要頂住呀！

終於離開一個地獄了

 好耐update呢度了，係時候update一下近況，雖然竹找寫完都唔會有人睇到架啦。。。。

終於離開咗一個地獄了，點解叫做地獄？個老細兩三星期完全無同過你講野，下下都係背後插你兩野，呢個係乜野既工作環境？真係好累。。。佢既上司不停為佢護航，我都唔想再講了。我都有感覺既，第二身第三身既感覺我唔知啦。。。不過都係算啦，都過咗去了，起碼身邊所有的同事都為我不值，我哋都係只能祝福佢啦，其他我什麼都不知道。係唔捨得未完既project，和埋身邊既其他同事，不過工作的野，真係唔好有任何留戀。心很累，真的需要休息。

最終我的散水禮物都係自己制作的擴香石，幾好呀。

雖然都仲未搵到工，馬會無消息，其他都無消息，要等？唔知呀，我盡我能力啦，我都好難估計和好難可以預到。希望有好的轉機吧。我喜歡馬會的工作，但無second in我都真係無計，唯有再搵啦，無緣真係無辦法。

佢開始帶團了，第一團係五日台灣。我都好少搵佢，最終問佢要唔要接機，佢話好，就去接佢了。但有說話聽。。。話佢前度係佢出團時會送佢，又會接佢。。揸佢架車喎。。。我邊夠膽揸佢架車呀！一陣整花我真係十修命都唔夠死啦。。。頂。。。我唔揸呀，叫的士啦！其實佢最近係煩緊搵律師覆前度單野，前度出律師信叫佢搬走，又唔提還錢，佢搵律師回佢。。總之就係煩。。。唉，又係呢啲野。。。佢一遇到呢啲野，就會好煩。。我見到佢都煩，有時間就陪下佢。。。所以第二日就陪佢。。。陪佢去做物理治療，係門口等佢。。。陪佢做facial...係樓下搵地方行住等。。。陪佢捐血。。。搵地方hea...跟住有人搵佢，我醒水啦，佢去foodcourt食野，我唔會啦，佢一向都唔鐘意俾人見到我既。。。我當然係醒水，搵個老遠既地方食啦，反正食野我都係求有野放入口，有野落胃，飽咗，完。最終又係陪佢去整塊面。。。跟住我走先。。。去買榴槤再去打波。。。打完波趕過去九龍灣陪佢食。。。唉。。。我知我竉壞咗佢，竉到佢成個公主禁。。。。

識咗佢十年，鐘意咗佢十年。。其實都有，但我知佢嫌棄我好多野，都係啲外在條件，我唔會做得到的，所以唉。。。陪完佢過咗呢個時間，佢搵到第個，我會走架啦，或者佢未搵到第個，我都做走架啦，我唔想再阻住佢，佢成日痴住我，佢唔會搵到個新架啦。雖然ami之前講我另一半的野，佢全部都中，但我知佢唔會鐘意我，所以我都唔想迫佢，更加唔想勉強。佢有佢要求，佢有佢想的，而我。。。我放棄了。。。。愛情，我真的無能為力，個個都十年，我仲可以有幾多個十年？女神禁多年我都仲係鐘意佢，下個係佢，之前暴小姐係好，但唔係嗰種感覺囉。

佢係台灣的旅程問我要咩手信，我話我想要的手信係想你健康平安。真心的，我只係想佢平安。。。手信有無我都無咩所謂，我都無欲無求既。其實我都有的要求的，只係我個人太無咩所謂啫。

其實佢要啲好聰明的人，但聰明的人可能會好多鬼計，好假？so far佢啲前度都係好叻好聰明的人，但有啲性格奇怪火爆，有啲係將真面目收到好埋的人。而我。。。好似兩樣都唔係。。。我係聰明，但品性善良，當年好彩信神，如果唔係都係壞咗了。我好細個就讀天主教學校，好乖，好純，其實個人聰明古或，但壞極有限，阿媽教得好，阿嬤都教得好，所以唔會害人，情願自己受。

今晚佢個女話去日本讀書，佢真係辛苦，一生兒女債。記得當年我升唔到中六，媽咪有問我，去唔去加拿大讀書？媽咪有錢可以供我去外國讀書啊。我諗諗下，唔想媽咪駛禁多錢供我，更加唔捨得阿嬤。。。所以我同媽咪講唔駛了，之後好好彩，HD收咗我，我知我叻既。之後讀大學，我都有問過下媽咪的意見，大學的所有錢都係我自己俾的。其實好細個都知媽咪爸爸搵錢辛苦，會學識唔好駛禁多，我同阿妹兩姐妹都係，應駛則駛，呢啲都係媽咪教的。

今晚仲有個小插曲，佢話我好話佢個女讀既野無用。。。我O晒咀。。。我一句都無講過。。。而且我性格唔會講呢啲啦。。。傻既咩，我只係講咗句，叫佢努力加油，個女讀書唔平啊。有無用，真係無人知，佢只係不停追問個女係咪AI野，係咪讀AI既野，有無用等等。。。我知都唔敢講得太多，我只係覺得個女鐘意讀乜咪乜囉，有無用，搵唔搵到錢，真係估唔到架喎。當年我選科，我媽都無咩俾意見，只要我鐘意，阿妹都係，阿妹有問我，我都有俾少少意見，但最終都係我地鐘意。可以講媽咪係竉壞我既，係真的，但放手俾我地成長，就算跌，起返身會更加堅強，呢樣係我地真正學到的野。媽咪先係最叻，識得教我地，無論做人定係做野都係。

我只係想做個簡單的人，唔想計來計去，真的很累。。。。