文書處理？

 呢兩日不停係度幫佢。。。整佢公司的野。。。又word又excel仲加埋power point。。。乜叉都拎晒出嚟。。。原來Mac和pc既word和excel真係有分別的，無論係用法又或是format都有口日竹戈啲分別。。。仲要整完之後開返完全唔同晒。。。真係暈呀。。。。

有時真係唔明佢。。。明明自己搞唔掂，又要答應人地幫手。。。心地好係我鐘意佢既其中一個優點，可惜係搞到我呢。。。禁夜瞓，禁早起身幫佢整，去打波，但其實個心係佢度，點打，心都不在，個人係度都無咩意思吧。本來約咗啲波友打完波去飲茶，最終無食野返嚟幫佢做到五點幾。。。搞咩呀我。。。真心唔明自己點解會禁。。。屋企有少少野食既，但唔會係好飽。。。因為無咩時間食，好彩有盒奶頂一頂，但最終都搞到無晒電。。。要飲寶礦力頂。。。

我都好耐無用word和excel做過呢啲野了，上一次都係幫佢搞。。。我自己份工唔駛搞呢啲野，校友會我都好耐無搞呢啲了，俾咗人地搞，我要求唔高，只要見得人就算了，唔駛太在意啲格式行距等等，由佢啦，出到就得啦。。。

講返佢，佢終於真係last day了，之後續唔續真係唔知，交俾神安排啦，續佢又辛苦，唔續佢又悶，不過等佢自己決定啦，禁大個人。。。意見我俾晒了，我只係想佢好，佢做咩決定我都會支持佢的。

有時真係唔係好明白自己，做乜野會禁對佢。。。我愛佢的。。。想講出口，想攬住佢鍚，但一切一切都唔敢做出嚟，可能因為我係乙木掛。唔知佢知唔知佢我心意，但佢知道今日我所做的，唔係佢的話，我真係唔會禁做。。。我仲多口話佢以身相許都唔掂。。。其實我講笑，但諗返卜我唔應該禁講。。。抽佢一野水係唔啱既，但真係唔知佢點諗了，佢都話佢自己賣身都唔掂。。。

有時諗。。我知我唔係佢想要的，無論外貌，高度，type都唔係佢想要的，又搵唔到錢，又弱，只係無止境禁錫佢。。。我唔應該太投入，最終我決定要走抽身又係好似六年前禁辛苦。。。我知我真係好憎自己，好想虐待自己。。。每日都不停想虐待自己。。。唉。。。死啦。。。我個心又係晒佢度，要抽身又係玩死自己禁，點算呀。。。

不過近期佢對我的態度真係有啲奇怪。。。好咗？真係唔知，等佢返嚟先諗下傾下啦，暫時都係等佢生日開開心心禁過啦，其他暫時唔諗住。佢唔係香港的呢個星期，我最多都係打波和約下朋友食飯，佢返嚟的那日，我都諗緊點。。。我應該唔打波。。應該係。。。

今日佢有叫過我唔好去打波，幫佢整埋啲野，但係呢。。。今日班全部都係朋友，仲要講咗話打完波去飲茶，所以我都係出現好啲，仲要簽場。。。所以。。。最終都係拎埋notebook去打波，可惜都係幫唔到手。。。

多咗部notebook，我多咗寫blog，呢度係我最舒服想表逹自己的地方。。。

昨晚開部機幫佢做野時，順手睇下以前啲相。。。我發覺我同佢無咩合照，根本可能係無。。。其實六年前我都知佢唔想同我影相，呢樣野我從來都知，到現在我都知。。。佢有同事行，我會自動自覺走開，我知佢介意。。。我知佢介意人地點睇。。。係我先唔介意人地點睇啫，可能係我太型，又或者係我太純掛。。。

累了。。。太早起身，做得太耐了，得閒再談。。。