人生無常

 今日突然收到一個消息，我大學同學突然走咗。其實當年讀書都聽過佢有啲病，又有做手術又有食藥，詳細無問太得清楚啦。畢咗業後，都好似見過一次，有係 fb睇到佢既近況的，早幾日明明仲見佢有出post，原來已經係最的一個post。

收到消息後，我只係通知熟啲的同學和老師，我無打算去，老師和有啲同學會去，仲問會唔會聚下。其實嗰晚我有波打，而且白事我都少去為妙，為咗老豆既健康著想。

最記得嗰個同學有次考試出貓，無啦啦跌咗張貓紙落嚟地下，我同另一個同學見到，真係唔知好嬲定好笑了，我同學嘗試踢返張貓紙俾佢，最後大家都安全。但呢單野，真係記一世呀 !

其實今個星期頭我都收到校友會副主席兩公婆燒炭自殺死咗既消息，我第一次睇新聞都估緊係唔係，原來真係。除咗有啲行政野要做外，其實聽到我心情都麻麻。個副主席雖然唔算好熟，見過幾次面，傾過幾次計，佢服務學校多年，又係校友，所以唔多唔少都會識既。

當年起會章，我係預有人會辭職唔做，所以先寫條出缺出嚟，估唔到今日居然會用到。

一連兩單野，我心情當然唔好啦，又加上阿嫲死忌，四年了，那份痛如昨日的痛。我仲記得阿嫲走前，其實阿媽已經出咗事了，我仍要扮無野扮開心氹阿嫲，因為唔想佢擔心，又唔想佢知。但其實阿嫲應該估到，我扮開心個樣，都係死頂出嚟。阿媽仲係ICU，點扮無野？我只係知當我一個人時，我就唔需要再扮開心，扮無野，可以盡情發呆。但傷心的心情是需要時間去消化的。

其實今日我都係唔係好開心，一來朋友的事，二來我自己的事。我應該俾返晒佢既野佢了，佢無野再係我度了。應該完結？應該無野再拉住？嗰晚講完佢唔敢再打俾我，佢話驚喎。我都諗返我有無衝動到？其實無，諗咗好多個月啦，係腦海中都排過無數次，反應都係預計之內。講到尾，我都唔係佢杯茶，早啲放手都好既。但佢唯一一個反應係我預計之外，就係佢估我怕拖。。。講真，我都係一個非常揀擇既人，好多要求，但我唔同佢，佢要外表，我唔太係。。。加上我已經對愛情失望了，唔敢再去愛，所以都幾難有拖拍。唯一同自己拍拖囉～哈哈～

佢仲係外地，我唔敢亂講啲乜野，我唔想影響佢工作，但佢今次的行程都順利，加上無再搵我，我當完架啦~ 唔見架啦~ 俾埋份 report俾佢，正式完結晒所有野。

所以我心情唔多好，只想又收埋自己係間屋就算！加油，一定撐得過去架!

林蛇返咗嚟呀!

 近日林蛇返咗嚟，早幾日見過佢一次，佢情況好咗好多呀～今晚同校友會班朋友出嚟食飯，大家好耐無見，傾得好開心，傾咗好多野，大家都好盡興。

今晚同kit傾咗幾句，講起公司啲野，講到我公司啲老細只係識鬧人，不停鬧人發洩，完全無諗過解決咗事情先，唉。。。其實呢人生活只有工作，無其他。唔駛太上心佢哋講啲咩，只需要做返自己。諗真啲，真的，我老細鬧完又鬧都係差唔多既野，所以佢其實只係為發洩吧。

我哋打波既人，因為運動，所以有地方舒壓。由其當partner打得唔好時，唔會鬧人，只會不停鼓勵別人，希望俾多啲信心人哋，打好啲，我support少啲。打波可以舒壓，又可以學懂人生道理。

其實呢度工作量真係一時時。我呢幾日堅得閒。。。。只要佢啲野唔好集中一齊嚟既話，應該會好啲。

終於講咗了。。。放手，對大家都好

終於講咗了。。。但佢好似唔接受。。。唉，我都唔知點講好了。。。累。。。我認真講，佢當我講笑，仲話我自己鑽牛角尖，仲話唔做得朋友既。。。佢仲問我想佢點。。。唉，我邉叉知點答啫，我只係知我想放手，我要迫自己唔好理佢，要離開，俾佢有空間搵個佢真正鐘意既人。。。可能我一相情願掛，我信命，我知我條命係禁。阿慧成日話我好討厭自己，成日要迫自己埋牆角。其實係架，成日都想人哋好，情願自己受。

唉，前面係點，我真係唔知，我只係知見步行步。

佢有問我係咪因為坪洲，我話唔係，佢無野比得上我，我做咩要呷佢醋。又唔夠我靚，又唔夠我細心，又唔夠我聰明，禁佢憑什麼？哈哈，我講完都佩服自己，那來的自信。

其實我驚佢估到我想講咩，我成晚都盡力控制自己，盡力做好啲，唔好俾佢發現。我已經做得好好了，起碼佢無發現啦～我無啦啦講呢啲野，佢都估唔到，其實係，雖然我真係諗咗好耐。不過俾返晒啲野佢，起碼我心安樂先，無野欠佢，今次真係無啦。佢條舊鎖匙，我到今日都搵唔返。。。。-.-"""收得實在太好啦。。。。

放心，我無咩事，係唔開心，但起碼解決咗一件事，情緒會好啲啦。

update工作和其他

又係時候想寫下野，最近心情麻麻，一來為工作，二來又為感情，其實好多野煩，好累。。。好想所有野都解決，但似乎不似預期。

先講工作，我成日做錯野，又唔小心睇唔到，成日俾老細鬧，又唔準時交野，又唔交代，總係做得唔好，唉，我都唔知可以點了。想搵工，但好似個市麻麻，聖誕前都有啲agent搵下我，呢幾日完全無，又無interview，總之就靜啦。不過佢決定炒我既話，我都無計，唔做野半年都ok既，不過支出真係要就住。一份工要做到有情緒病，真係。。。。唉。。。嗰晚林蛇先分享，要放手，放開先可以遠離情緒病，唔放下，永遠都只會係嗰個位度轉。佢講呢樣野，我感受到好深，我知我都差唔多，只係無佢禁嚴重。我都驚架，由其最近柳爺自殺死咗，佢好似好正能量，但小慧成日講，我有咩事，佢點算！我知，我唔可以俾自己有事，因為阿慧係我裏面，只有我存在，佢先可以存在。

不如講下感情，講啲簡單啲既野先。十二月同小慧食飯，得兩個人，好興奮。今個月林蛇返咗嚟，又同小慧食飯，我拉住佢隻手 ，嗰下真心心跳。同佢相處，我都係要扮無野，同埋唔好太揚俾人知。。鐘意咗佢三十年，原來真係放唔到手。。。不過佢屋企都好多煩野，佢自己都要面對好多煩野。我同佢都唯有交俾神啦，我哋都無能為力，等待神的安排吧。

又講下佢，原來我同佢個女既日元係一樣，呢啲真係1/60既機會。。。31號嗰晚佢上咗我度打邊爐，之後唔理我，出咗去同車會啲人睇煙花倒數。我激到爆炸，當然我唔會鬧佢啦，只係心淡和失望。我一號唔聽佢電話，佢仲將個責任推返俾我。。。嘔血。呢期仲少搵我。我決定咗同佢講清楚，係唔習慣架啦，不過真係要做，對大家都好。我感情緣係差架啦，不過。。。無計啦，我自己都知我係禁架啦，加油呀!!!

要正面啲，加油呀!

2023 生日加近況update

現在係夜晚一點幾，其實我應該瞓覺，但我都想寫少少update一下。

生日嗰日，我自己一個去咗海洋公園，行咗個圈，無了，好悶。。。夜晚約咗阿妹食飯，食壽司朗。再夜就返嚟同熊仔慶祝！

近日天氣好凍，我禁鬼怕凍，真係好那凍。。。。。

公司既事，放假就放假，我唔想再放假開工了，很累。

放四日假，真的放假，其他不理了。

同佢，我仲未有機會講，其實佢真係唔啱我，個人唔靚，加上又好煩。。。煩。。。唉。。

其他都無太多特別。。。只係份工好累，想轉工，暫時頂住先，搵到就轉！！！

近況update

佢青龍頭間屋終於要清走了，早幾日搵埋肥仔車野走咗一轉車，坪洲係度。。。今晚坪洲又同佢打我小報告。。。又話我唔同佢打招呼。。。又話我無禮貌。。。頂，佢幻聽定時覺失調呀，我有同佢打招呼架，唉，算啦，佢都唔係一個解決問題的人，佢只係一個制造問題的人。。。算啦，我都廢事同佢嘈，解決件事先最緊要。

早幾日我手多問塔羅，又講中咗佢想珍惜我，但又唔知大家咩關係既情況。唉，整定？

工作又有時miss咗一啲野，但都盡力去完成，好彩係月尾我狂run晒好多code出嚟，所以miss咗既job都可以好快完成，我仲同老細講聽日，但三十分鐘搞掂咗了。就快到試用期，我都唔知過唔過，問心係有啲位做得唔太好，但我都好勤力去完成了，盡咗力，無悔啦。我唔係叫無output，只係有時真係要啲時間pick up，第一次做係會有啲甩漏，第二三次會好啲，但最緊要唔好有壓力。

工作和生活都非常之煩惱，希望一切都順利。我要信順利，記得要信。

最近打風真係無咩野做，悶，居然走去開工，哈，果然工作係最好的解悶方法。

無太多野想update了，想記的盡能力去記，但太忙真係唔知仲可以講咩好了。

近況update~

 原來我忙到一段時間都無打blog了，今晚終於抽到少少時間打幾隻字，我相信都唔止幾隻字掛。。。。總會想記錄一些事情，又想去寫一點感受。

先講做野先啦，上星期忙到一個點，可能啲野新接手，好多好多問題出現，一路做，一路都面對唔少問題，要諗方法去解決，唉。。。我仲差啲準確度，好多野錯，一來有啲唔小心，二來係真係唔夠經驗，唉。。。真係擔心又嚟過，不過我會盡力去check多啲架啦，問多啲點check，我連佢啲system都唔多識用。。。加油啦。。。呢個係我唯一最唔開心的野，又係我最擔心既野。呢單野都係得我啲老友知，其他無咩人知了。我知我準確度真係差啲，我會問多啲，睇多幾次架啦。

佢個女就快飛日本了，嗰日我都未諗請半日定wfh送佢個女機，未諗掂。。。不過請半日假係會好啲既，未諗呀。佢不停幫個女安排啲farewell dinner....我都係被安排之列。。。有好有唔好啦，不過佢真係有啲煩。。。唉，唔識講。

佢同我講坪洲成日衝出嚟話幫佢做野，但成日都領野，中晒伏，領咗野又唔識處理，要佢執屎。。。唉，鬼咩。。。條友又蠢， 處理能力又差，應變又差，抗壓能力又差，我真係唔識講咩了。我唯一一樣野比佢好，就係我醒目地見到有幾多伏位，知道之後會點，唔會循出嚟柒，哈哈。我解決問題既能力都非常之高，呢個都係我優點嚟架。個個有事都會來問下我點解決，因為知我分析力強掛。

有晚我幫佢上去佢屋企搵野，佢又點咗坪洲拎返野去佢屋企，佢都同坪洲講咗我係度，正常我一個人係屋企當然係會lock閘啦，條白痴連鐘都唔試下按就用鎖匙開門。。。-.-"真係白痴，我聽到門口有聲先去望下門口。。。講真，我次次無論有無人，我都會問清楚佢，再係門口聽下有無聲，無聲我就用鎖匙開門，有聲就按鐘啦，基本禮貌嚟架。我走去開門，條白痴鎖返道門，我開唔到，講咗句頂啫，條友好話我講粗口，唔熱烈歡迎佢。屌！你禁燃慢，又禁燃蠢，係c9先頂得你順，我真係頂唔順會爆炸！真係救命。成日都話，唔好嘗試了解蠢人，真係了解不能的。

講多樣野，佢話坪洲成日做野個腦一片空白，聽一半唔聽一半。。。。我諗條友都幾大壓力搞到禁。我自己就太習慣俾人鬧了，我老豆仲鬧得毒，只要忍得住，唔好理，唔好聽，由佢，就過到關架啦~~ yeah~~~

訢完無事架啦。。。。加油呀～～～

三年了

 三年了，媽咪走咗三年了，今日係媽咪舊曆的死忌，我固意wfh中午過去拜媽咪。我諗我妹和我心情都係差唔多。去拜媽咪又喊到傻咗。。。本來想叫佢今日陪我，但最終都係唔駛佢啦，我自己陪自己好過啦，唔駛係任何人面前扮堅強。

媽咪成日都 話煮到埋嚟就食，面對好多好多問題，其實一切我都無咩把握，順期自然，可以等到幾時？我都唔知。。。所以我會為自己定咗一啲。。。目標？底線，總想為自己好一點吧。

三年前的那幾年，好似昨日發生一樣。。。媽咪的離留，她或許會帶著遺憾，但兩個女都好叻好聽話，應該可以吧。其實兩個女都好鐘意痴住阿媽。。。。真係好痴身。。。XDD

其實阿媽好識生我，我真係有啲聰明。。。八字勁多水，又係人馬座，無論點算都係聰明。我唔習慣用口問野，我習慣用觀察去搵答案。。。其實觀察加埋想像，我知好多好多野。。。唉。。。我都唔想講了，由佢啦，佢自己喜歡啦，我又唔係佢邊個，我控制唔到好多野。

七月十四

 話講話講，都八月尾，都未講到，唉。。。係我心軟定係次次想講都有太多的變數呢？又係月老的安排？

佢聽日就飛泰國了，去五日，返嚟幾日又飛突尼西亞，一去就去十日。返嚟好似係星期五。。。唔知去唔去接佢，再諗啦。不過佢泰國返嚟我應該唔去接佢了。

佢搵我幫佢執屋，我又發覺自己好似阿四，都唔係第一日架啦，原來我仲未習慣呢個阿四的生活。

昨晚我又上咗佢屋企執野，我有個習慣，執親野就想鬧人。。。執執下，佢話同坪洲上嚟，仲問我介唔介意，佢話我仲可以繼續係佢度執野，佢同坪洲係度。我唔想禁，所以我火速閃就算了，反正我返屋企都大把野搞，唔想係度見到佢哋，我唔想睇。我介唔介意？唔通我呷醋要話你知咩？我情願乜都唔知，乜都唔見。我又唔係邊位。

工作唔太忙，我開始想WFH，太累了，我個人比較累，所以想休息多啲，WFH一下。但WFH我都應該好多野做啦，習慣吧。

愛情控制不來，那努力工作吧。起碼我努力工作真的有回報的。愛情沒有回報，只有付出，我有點累了，不是有點，是很累了。我還可以支持多久？到底我還要拖到何時呢？

今日係七月十四，仲有幾日係阿媽死忌，我心情都唔太好。

打咗兩日風...

打咗兩日風，星期五全日我都只係係屋企wfh....做到隻野禁。。。頂....本來仲想約班波友去飲茶，最終都係努力係屋企工作。工作完咗就開始打風了。。。吹到傻。。。仲俾我發現有個位有少少漏水。。。好彩係好細的位，好彩發現得早，真係感恩。

佢今晚返來了，佢個女聽日就飛日本，夜要幫佢餵狗，佢又夾咗我同雄哥食飯，跟住返青龍頭執野再返九龍灣。原來佢借咗青龍頭間屋俾坪洲，佢想搵埋我上去執野，但又唔想坪洲係度，跟住坪洲串佢，佢頂返坪洲，仲嬲咗坪洲，呢下真係好好笑。坪洲又唔識做人，真係唔知可以點話佢，而呢個，唉，我真係唔識講。昨日佢又無啦啦講咗啲好奇怪的野。。。又問我係咪真係佢無人要，我就要佢。。。頂！呢個問題妳要我點答妳好？氹住妳話係，我真係講唔出口，因為呢啲說話講出呢真係好好聽，但做唔到對方係好傷心，我唔想做啲傷害佢的事。我情願讓愛退出，我都唔想佢唔開心。可能我真係好傻，又可能真係好白痴，但呢個係真正的我。

仲有一樣野我諗唔明。。。幾時先知佢無人要呢？禁啫係佢當我咩？我真係唔知，諗唔透，諗唔明。。。。我以前是冠軍，怎會慣做後備愛人....

前幾日我幫佢執野，佢同坪洲返嚟，我費事阻住佢哋，所以火速閃。佢今日講返，坪洲話我係度都無所謂，仲話我好急急腳走。。。-.-""啲人唔識做人真係我都真係唔識講咩好了。我禁鬼醒，明知佢會呷我醋，佢又幫c9整野，而啲野係緊要既，禁不如我閃先啦，反正我執野鬼禁快。。。只要忍口唔好嘈可以再快啲既....用咗十秒平衡輕重當然醒水知自己幾時需要消失啦。唉。。。呢啲人我真係唔知可以講咩好了。

有人話八字好多水的人好聰明，好醒，個腦轉得好快的。我認我係架，只係我唔需要下下通知你我知。。。所以呢，有時我識收聲既，只係人馬真係多口，多事因為心地好啫。

我幾時同佢講好呢？唉。。。我真係唔知，我都頭痛緊。。。煩緊....

頂，掛住講佢的野，原來我應該講打風的野既。

落波前約咗啲波友去食tea之後去補場執雞打波，諗住打完波就上恩恩屋企煮飯仔。。。最終我地執咗兩個鐘頭，打到八點去恩恩度煮飯仔。。。。

我以後打波或者hea打都會記得拎護膝架啦，無戴護膝打波，又痛啦，頂....我以後唔敢啦.....